16.07.2026 | 23:29
Հետաքննությունը պարզել է, որ Ալիևի թոռներն անօրինական կերպով օգտագործում են պաշտոնական լիմուզիններն և անվտանգության մեքենաները
2006-ից ՌԴ-ում եմ ապրում, եկել եմ ընտրություններին մասնակցեմ, հետ գնամ. Քոչարյանի աջակից․ ՏԵՍԱՆՅՈՒԹ
Հասարակություն
05.06.2026 | 17:41
Մոսկվայից ընտրություններին մասնակցելու համար Հայաստան ժամանած Արամ Եսայանը վստահեցնում է, որ որևէ աջակցություն չի ստացել և ճանապարհածախսը հոգացել է սեփական միջոցներով։
Ինքը ներկայացավ որպես «Հայաստան» դաշինքի աջակից և երկար տարիներ ՀՅԴ անդամ եղած անձ՝ նշելով, որ Մոսկվայից Հայաստան է եկել բացառապես ընտրություններին մասնակցելու նպատակով։ Եսայանի խոսքով՝ Հայաստան է ժամանել մայիսի 2-ին, իսկ վերադարձի տոմսը նախատեսված է հունիսի 17-ին։ Նա հերքեց տեղեկությունները, թե Ռուսաստանում բնակվող հայերին ֆինանսական աջակցություն կամ այլ արտոնություններ են տրամադրվել ընտրություններին մասնակցելու համար Հայաստան գալու նպատակով։
«Ես եկել եմ իմ աշխատավարձով։ Գործ եմ արել, փողս ստացել եմ ու էժան տոմս գտնելով՝ եկել եմ»,– նշեց նա։ Արամ Եսայանն ասաց, որ Ռուսաստանում աշխատում է որպես էլեկտրաեռակցող։ Նա Հայաստան է եկել կնոջ հետ և ընդգծեց, որ հայ համայնքում ընտրություններին մասնակցելու նպատակով կազմակերպված հորդորների կամ աջակցության մասին որևէ կոնկրետ տեղեկություն չի ունեցել։
Նրա խոսքով՝ «Զվարթնոց» օդանավակայանում իրեն ոչ ոք չի դիմավորել, որևէ հատուկ գործընթաց չի եղել, իսկ սահմանային ստուգման ժամանակ միայն բուկլետ են փոխանցել։ Եսայանը նշեց նաև, որ Հայաստանի քաղաքացի է և Ռուսաստանի քաղաքացիություն չունի։ Նրա ընտանիքը տարիներ շարունակ բնակվում է Ռուսաստանում, որտեղ սովորում է նաև նրա 20-ամյա որդին։ Վերջինիս խոսքով՝ որդին ուսումն ավարտելուց հետո կվերադառնա Հայաստան և կծառայի բանակում։
Խոսելով ընտրություններին մասնակցելու պատճառների մասին՝ Արամ Եսայանը հայտարարեց, որ քվեարկում է «վաղվա Հայաստանի» համար։
«Եկել եմ, որ ձայնս տամ, որ Սահմանադրություն չփոխվի, որ թուրքը չգա մեր հողին տիրի, որ սև ու սպիտակի բաժանումը չլինի»,– ասաց նա։
Լրագրողի հարցին, թե արդյոք Հայաստանից հեռացել է Ռոբերտ Քոչարյանի նախագահության տարիներին, Եսայանը պատասխանեց, որ այդ շրջանում Հայաստանում զբաղվում էր գյուղատնտեսությամբ և վատ չէր ապրում, իսկ Ռուսաստան էր մեկնել նոր հնարավորություններ փորձելու նպատակով։ Նա հավելեց, որ անկախ ընտրությունների արդյունքից՝ մտադիր է ապագայում վերադառնալ Հայաստան, սակայն կցանկանար, որ ընտրվեր Ռոբերտ Քոչարյանը։
Մանրամասները՝ տեսանյութում։
Նարեկ Կիրակոսյան
