Հայաստանը դառնում է «ԱԲ գործարանների պարտեզ»․ ԼՈՒՍԱՆԿԱՐՆԵՐ

Հրազդանում կառուցվող արհեստական բանականության մեգակենտրոնի պաշտոնական գործարկման նախապատրաստական աշխատանքները մոտենում են եզրափակիչ փուլին։ ԲՏԱ նախարարությունից հայտնում են, որ նախագծի առաջին փուլի ներդրումների ծավալը կազմում է 500 մլն դոլար, իսկ երկրորդ փուլի ավարտին, ըստ ներկայացված տվյալների, ընդհանուր ներդրումները կհասնեն շուրջ 4 մլրդ դոլարի․ նախատեսվում է, որ մինչև 2027 թվականի ավարտը կենտրոնում կգործարկվի ավելի քան 100 հազար NVIDIA Blackwell և Vera Rubin GPU։

«Հրազդանում արհեստական բանականության (ԱԲ) մեգակենտրոնի կառուցումը մոտենում է եզրափակիչ փուլին։ 𝗙𝗶𝗿𝗲𝗯𝗶𝗿𝗱 𝗔𝗜 ընկերության համահիմնադիր Ալեքսանդր Եսայանի հետ այսօր տեղում ծանոթացանք պաշտոնական գործարկման նախապատրաստական աշխատանքներին և ենթակառուցվածքների պատրաստվածությանը։

Այս նախագիծը ոչ միայն հզոր ինժեներական կառույց է, այլև Հայաստանի ապագայի տեխնոլոգիական տնտեսության կարևորագույն հիմնաքարը։ Մեր ռազմավարական նպատակն է երկիրը վերածել գլոբալ «ԱԲ գործարանների պարտեզի», որտեղ գերհզոր հաշվարկային հնարավորությունները, տեղական տաղանդն ու նորարարական էկոհամակարգը կաշխատեն փոխլրացմամբ։

Ծրագրի առաջին փուլի ներդրումների ծավալը կազմում է 𝟱𝟬𝟬 միլիոն ԱՄՆ դոլար, իսկ երկրորդ փուլի ավարտին ընդհանուր ներդրումները կհասնեն շուրջ 𝟰 միլիարդ ԱՄՆ դոլարի։

Այս մեգանախագիծը կդառնա տարածաշրջանի խոշորագույնը։ Գործարկումից հետո 200,000 քառակուսի մետր տարածքում կաշխատի ավելի քան 6,000 NVIDIA Blackwell GPU։

Մինչև 2027 թվականի ավարտը GPU-ների թիվը կգերազանցի 100,000-ը (NVIDIA Blackwell և Vera Rubin)` Հայաստանը դասելով արհեստական բանականության հաշվարկային հզորությամբ աշխարհի առաջատար հինգ երկրների շարքում։

ՀՀ կառավարության և Firebird ընկերության համատեղ համագործակցության շնորհիվ Հայաստանը տեխնոլոգիաների սպառողից վերածվում է աշխարհին արհեստական բանականության բարձր տեխնոլոգիական արդյունք և լուծումներ առաջարկող երկրի, որը պատրաստ է սահմանել ապագայի խաղի կանոնները»,- ասված է հաղորդագրությունում։