Դուք Օսիպյանին ասել եք թռած, գիտեք` դասալիքների դեմ է պայքարել. Սիմոնյանը` Փաշինյանին. ՏԵՍԱՆՅՈՒԹ

«Հայաստանն ընտրում է» նախընտրական բանավեճի ժամանակ Հայաստանի շնորհապետական կուսակցության առաջնորդ Գուրգեն Սիմոնյանը դիմել է վարչապետ Նիկոլ Փաշինյանին՝ կապված կալանավորված Արթուր Օսիպյանի հասցեին «Ղարաբաղից թռած» արտահայտությունն անելու համար։

Սիմոնյանը շեշտել է, որ Օսիպյանն Արցախում պայքարել է դասալիքների դեմ և «թռած տղա չէ»։

Ի պատասխան՝ Նիկոլ Փաշինյանը հակադարձել է՝ չհրաժարվելով իր ձևակերպումներից և հստակեցնելով, թե ում է ուղղված իր քննադատությունը.

«Ես ասում եմ՝ Ղարաբաղի պսևդոէլիտայի ներկայացուցիչները, ներառյալ այսպես կոչված քաղհասարակության էն ներկայացուցիչները, ովքեր եկել են և ուզում են պատերազմի ու հորձանուտի մեջ նորից վերադարձնել Հայաստանի Հանրապետությունը, նրանք բոլորը փախած են, և նրանք բոլորը թռած են»։

Հիշեցնենք, որ այսօր արդեն 17-րդ օրն է, ինչ Արթուր Օսիպյանը հացադուլի մեջ է։ Արաբկիրում «Քաղաքացիական պայմանագիր» կուսակցության քարոզարշավի ժամանակ միջադեպ էր տեղի ունեցել Նիկոլ Փաշինյանի և Արթուր Օսիպյանի միջև, որից հետո Օսիպյանը ձերբակալվեց, ապա երկու ամսով կալանավորվեց։ Արցախցի գործիչը հացադուլ է հայտարարել։ Փաշինյանը Օսիպյանին «փախած» էր անվանել։

Հացադուլը դադարեցնելու հորդորներին ի պատասխան՝ Օսիպյանը հայտարարել է, որ հացադուլը կդադարեցնի այն ժամանակ, երբ Փաշինյանը ներողություն խնդրի իրենից։ Նրան մեղադրանք է առաջադրվել ՀՀ քրեական օրենսգրքի 330-րդ հոդվածի 2-րդ մասի 3-րդ կետով (բռնություն կիրառելու հրապարակային կոչեր, բռնությունը հրապարակայնորեն արդարացնելը կամ քարոզելը), 297-րդ հոդվածի 1-ին մասով (խուլիգանություն), ինչպես նաև 211-րդ հոդվածի 1-ին մասով (քարոզչություն կատարելուն կամ քարոզչությունից հրաժարվելուն հարկադրելը կամ քարոզչությանը այլ կերպ խոչընդոտելը)։ Քրեական հետապնդում հարուցելուց և կալանավորելուց հետո հասարակական կազմակերպություններն ու իրավապաշտպանները իշխանություններից և իրավապահ մարմիններից պահանջում են դադարեցնել Օսիպյանի նկատմամբ իրականացվող գործողությունները։

Մանրամասները՝ տեսանյութում։