Վոլոդինը հայտարարել է, թե «Հայաստանը ԵՄ-ում կկորցնի իր ինքնությունը, ինչպես արդեն կորցրել է կոնյակը»

Հայաստանը կկորցնի իր ինքնությունը, եթե մտնի ԵՄ, ինչպես արդեն կորցրել է իր բրենդին «կոնյակ» անվանելու իրավունքը։ Այս մասին «Վեստի»-ին տված հարցազրույցում հայտարարել է ՌԴ Պետդումայի խոսնակ Վյաչեսլավ Վոլոդինը, գրում է ՏԱՍՍ-ը:

Նշենք, որ Վոլոդինը գրեթե ամենօրյա ռեժիմով Հայաստանի մասին հայտարարություններով է հանդես գալիս։ Ռուսաստանցի գործիչը նշել է, թե ԵՄ-ն Հայաստանին տնտեսական աճ է խոստանում, ինչպես մի ժամանակ խոստացել էր Ուկրաինային։ Սակայն ուկրաինական արտադրանքը երբեք թույլ չի տրվել մտցնել եվրոպական շուկաներ, քանի որ այն «անմրցունակ» է։

«Իսկ ի՞նչ է վաճառելու Հայաստանը։ Նրանք մեզ գինի են վաճառում։ [Ֆրանսիայի նախագահ Էմանուել] Մակրոնը եկավ, նա և [ՀՀ վարչապետ Նիկոլ] Փաշինյանը գրկախառնվում էին, դե պայմանագիր կնքեք և գինի մատակարարեք Ֆրանսիային։ Ո՛չ, նույնիսկ նրանց կոնյակն այժմ բրենդի է, քանի որ ֆրանսիացիներն ասացին՝ ձեր մոտ բրենդի է։ Նրանք կկորցնեն իրենց ինքնությունը, ինչպես կորցրեցին Ուկրաինայում»,- հայտարարել է Վոլոդինը։

Միաժամանակ, նա ընդգծել է, թե Հայաստանի ժողովուրդը պետք է առանձնացվի «իշխող էլիտայից», քանի որ հենց նրանք են «[երկիրը] տանում դեպի անդունդ»։ Վոլոդինը նաև պնդել է, թե Ռուսաստանն օգնում է և՛ Հայաստանին, և՛ նրա ժողովրդին, բայց դեմ է հարաբերություններում «ստին և երկակի չափանիշներին»։

«Մենք կողմ ենք միայն ազնիվ, բաց հարաբերություններին և, իհարկե, փոխշահավետ համագործակցությանը։ Բարեկամությունը երկկողմանի շարժով փողոց է»,- ասել է Պետդումայի խոսնակը։

Նա նաև հայտարարել է, որ Հայաստանի իշխանությունները ցանկանում են օգտագործել Ռուսաստանը՝ ի վերջո Եվրամիությանը միանալու համար․ «Նրանք հայտարարություններ են անում, որ մենք ցանկանում ենք մնալ ԵՏՄ-ում և հարաբերություններ կառուցել Ռուսաստանի հետ։ Ի՞նչ տեսակի հարաբերություններ։ Սպառողակա՞ն։ Մեր երկիրն օգտագործել՝ այս փուլն անցնելու և Եվրամիությանը միանալու համար։ Սա անազնիվ է»։

Ըստ Վոլոդինի՝ Ռուսաստանն օգնում է Հայաստանին և նրա բնակիչներին․ ռուսական գազը չորս անգամ ավելի էժան է Հայաստանի համար, նաև Ռուսաստանը շուկա է երկրի համար։

«Ուրեմն՝ վերցրեք ու հրաժարվեք դրանից։ Եվ բացահայտ հայտարարեք այդ մասին քաղաքացիներին։ Եվ գնացեք Եվրամիություն»,- ասել է Վոլոդինը։

Թարգմանությունը՝ Էմմա Չոբանյանի