Ռուսական գազից ավելի էժան տարբերակներ կան, այլ երկրներից ինձ ասել են․ Խաչատուր Սուքիասյան. ՏԵՍԱՆՅՈՒԹ

ԱԺ պատգամավոր Խաչատուր Սուքիասյանը չի բացառել, որ Հայաստանի տնտեսությունը կարող է վնասներ կրել, եթե դեպի Եվրամիություն արտահանման նոր մեխանիզմների ներդրման գործընթացը ժամանակ պահանջի։

«Իհարկե կկրի վնասներ, ես կարծում եմ կկրի վնասներ»,- լրագրողների հետ զրույցում ասել է նա։

Սուքիասյանի խոսքով՝ Հայաստանը պետք է նվազեցնի թարմ մրգի և բանջարեղենի արտահանումը և կենտրոնանա վերամշակված արտադրանքի արտահանման վրա։

«Դրանք պետք է չիր դառնան, դրանք պետք է տարբեր պրոդուկտներ դառնան և արտահանվեն և ամբողջ տարի արտահանվեն, ոչ թե մենակ էդ երկու ամիսը»,- նշել է պատգամավորը։

Անդրադառնալով գազամատակարարման հնարավոր այլընտրանքներին՝ Սուքիասյանը հայտարարել է, որ ռուսական գազից ավելի էժան առաջարկներ կան, սակայն հրաժարվել է նշել, թե որ երկրից։

«Ուզում եմ ձեզ ասել, որ հանգիստ եղեք, այն գազը, որը որ վերջնական արդյունքում սպառողին է վաճառվում, դրանից ավելի էժան առաջարկներ կան և արդեն շուտվանից կա այդ առաջարկները»,- ասել է նա։ Հարցին, թե որ երկրից է խոսքը, Սուքիասյանը պատասխանել է. «Չեմ կարող ասել։ Ոչ, Ադրբեջանը չի»։

Պատգամավորը նաև պնդել է, որ Հայաստանում գազի վերջնական սակագինը անհամեմատ ավելի բարձր է, քան ներմուծման գինը։ «Հայաստանի Հանրապետությունը միակն է աշխարհում, որ 120 տոկոս է գնի վրա տեղականը բարձրացնում գինը։ Նկատի ունեմ՝ այլ երկրում ձեռք է բերում այլ գնով, Հայաստանի Հանրապետությունում վաճառվում է 120 տոկոս ավել գնով»,- հայտարարել է նա։

Սուքիասյանի խոսքով՝ գազի մատակարարման ենթակառուցվածքների մասով ևս խնդիրներ չեն առաջանա, եթե Հայաստանը որոշի օգտվել այլընտրանքային աղբյուրներից։ «Իհարկե, իհարկե»,- պատասխանել է նա՝ անդրադառնալով անհրաժեշտ ենթակառուցվածքների առկայության հարցին։

Միաժամանակ պատգամավորը նշել է, որ ռուսական պետական կամ ռուսական սեփականությամբ կառույցները Հայաստանում շահութաբեր գործունեություն են իրականացնում և պետք է գնահատեն Հայաստանի համար ստեղծված պայմանները։ «Իրենք էլ պետք է գնահատեն, որ Հայաստանը ամենակոմֆորտ երկրներից է իրենց համար»,- ասել է Սուքիասյանը։

Մանրամասները՝ տեսանյութում։