Բանակի մասին մտածող ՀՀԿ-ականներին պիտի ստիպել ուտել զինվորին իրենցից ժառանգություն մնացած ուտելիքը. Նիկոլ Փաշինյան. ՏԵՍԱՆՅՈՒԹ

«Եվ էսօր Հանրապետական կուսակցությունը դուրս է եկել մեյդան, էդ տապանաքարի նման պլակատներն էլ սարքել են սևով.. և ճիշտ էլ արել են, որովհետև այս ընտրությունները պետք է արձանագրեն Հանրապետական թալանչիների քաղաքական մահը: Եվ էս ընտրություններով Հանրապետականին, որը քսան և ավելի տարի թալանել է երկիրը, պետք է նետել քաղաքական աղբանոցը»,- այսօր Մարալիկ քաղաքում նախընտրական քարոզարշավի շրջանակում ունեցած ելույթում հայտարարեց վարչապետի պաշտոնակատար Նիկոլ Փաշինյանը:

Ավելի վաղ հայտնել էինք, որ Փաշինյանը քարոզարշավը սկսել է Թալին քաղաքից:

«Էսօր ասում են՝ եթե մտահոգ եք բանակով, քվեարկեք ՀՀԿ-ի օգտին, այ բանակը քսան տարի թալանած սերմացու գողացող մկներ, դուք դեռ բարոյական իրավունք ունե՞ք բանակի մասին խոսել, դուք, որ մեր զինվորին «մայկա տռուսիկով» չեք կարողացել ապահովել: Բանակի մասին մտածող Հանրապետականներին պետք է բռնել և ստիպել, որ իրենք մի շաբաթ ուտեն էն, ինչ որ իրենցից ժառանգություն ստացած և իներցիայով, դեռ դրվում է մեր զինվորի սեղանին»,- իր խոսքում ասաց Փաշինյանը՝ մեջբերելով Հանրապետականի կարգախոսը:

Վարչապետի պաշտոնակատարը կոչ արեց՝ նրանց «ձայները կտրել և բանակի մասին ծպտուն չհանել», ասաց. «Էն , ինչ դուք արել եք բանակի հետ, կոչվում է ազգային դավաճանություն ոչ միայն բարոյական, այլ նաև քրեական իմաստով: Զինվորի հացը գողացած ոչ մի ստահակ չի խուսափի պատասխանատվությունից, նրանք հայտնվելու են բանտում»:

Եվ մինչ Փաշինյանը ելույթ էր ունենում, մարալիկցիները նրան զուգահեռ վանկարկում էին. «Արտա՛կ հեռացիր»: Խոսքը Մարալիկի քաղաքապետ Արտակ Գևորգյանի մասինն է, ում բնակիչները մեղադրում են գողության մեջ:

Մանրամասները՝ տեսանյութում: