Իսրայելական «KAN» հեռուստաընկերությունը ներողություն է խնդրել Հայաստանի փոխարեն Ադրբեջանի դրոշը ցուցադրելու համար. Հանրային ՀԸ

Հանրային հեռուստաընկերությունը հաղորդագրություն է տարածել՝ հայտնելով, որ Հանրային ՀԸ-ի պահանջած պաշտոնական պարզաբանմանը ի պատասխան՝ Իսրայելի հանրային «KAN» հեռուստաընկերությունը ներողություն է հայտնել «Եվրատեսիլ 2026»-ի ընթացքում տեղի ունեցած միջադեպի համար, երբ Հայաստանի մասին պատմող հատվածում սխալմամբ ցուցադրվել էր Ադրբեջանի դրոշը։ «KAN»-ի գլխավոր տնօրեն Գոլան Յոխպազը հայտնել է, որ դեպքը եղել է ակամա գրաֆիկական սխալ և որևէ վատ մտադրություն չի պարունակել։

«Հանրային հեռուստաընկերությունը պաշտոնական պարզաբանում էր պահանջել Իսրայելի հանրային «KAN» հեռուստաընկերությունից՝ «Եվրատեսիլ 2026»-ի երկրորդ կիսաեզրափակչի ընթացքում տեղի ունեցած միջադեպի առնչությամբ, երբ լրատվական ծրագրով Հայաստանի մասին խոսելիս ցուցադրվել էր այլ երկրի՝ Ադրբեջանի դրոշը։

Ի պատասխան՝ Իսրայելի հանրային հեռուստաընկերության գլխավոր տնօրեն Գոլան Յոխպազը պաշտոնական նամակ է հղել Հանրային հեռուստաընկերության գործադիր տնօրեն Հովհաննես Մովսիսյանին, որտեղ իսրայելական կողմը ներկայացրել է տեղի ունեցածի վերաբերյալ պարզաբանումը և ներողություն հայտնել թույլ տված սխալի համար։

Ստորև ներկայացնում ենք հատված «KAN» հեռուստաալիքի տնօրեն Գոլան Յոխպազի նամակից.
«Լրատվական բաժնի կողմից իրականացված քննության արդյունքում պարզվել է, որ դա գրաֆիկական սխալ էր, որը տեղի էր ունեցել ակամայից և առանց որևէ վատ մտադրության։ Մենք գիտակցում ենք, որ նման սխալը չպետք է տեղի ունենար, և անկեղծորեն ցավում ենք այն հնարավոր թյուրըմբռնման համար, որն այն կարող էր առաջացնել»,- ասված է հաղորդագրությունում։

Հանրային հեռուստաընկերությունը ներկայացրել է ամբողջական նամակն անգլերեն՝