Ադրբեջանի ընդդիմության բանտարկված առաջնորդ Ալի Քերիմլին հոր հուղարկավորությանը մասնակցելու թույլտվություն չի ստացել

Ադրբեջանի ընդդիմադիր «Ժողովրդական ճակատ» կուսակցության բանտարկված նախագահ Ալի Քերիմլին հոր հուղարկավորությանը մասնակցելու թույլտվություն չի ստացել։ Նա այժմ սպասում է մայիսի 15-ին նախատեսված հոգեհանգստի կարգին մասնակցության հաստատմանը, գրում է OC Media-ն։

Քերիմլին ձերբակալվել է 2025 թվականի նոյեմբերին Պետական ​​անվտանգության ծառայության կողմից՝ նախկին նախագահի օգնական Ռամիզ Մեհդիևի դեմ հարուցված քրեական գործի շրջանակում պետական ​​հեղաշրջման փորձ կատարելու մեղադրանքով։ Ալի Քերիմլիի հոր՝ Ամիրհուսեյն Քերիմլիի մահվան մասին հաղորդագրությունները սոցցանցերում տարածվեցին շաբաթ օրը։ Նույն օրը նրան հուղարկավորել են։

Ֆրանսիայում բնակվող վտարանդի ադրբեջանցի լրագրող Գանիմատ Զայիդովը գրել է, որ Քերիմլիի հայրն ամենաշատն էր մտահոգված որդու ձերբակալությամբ։

«Մահացածը, թերևս, այն մարդն էր, որն ամենաշատն էր զգացել Ադրբեջանի բոլոր քաղաքական ցնցումները։ Որովհետև այս ցավոտ դատավարության մեջ նա ուներ որդի, որին սիրում էր աշխարհում ամեն ինչից շատ։ Նա իր կյանքն ավարտեց ցավի և անհանգստության մեջ»,- նշել է Զայիդովը։

Քերիմլիի հոր մահը համընկել է Հաղթանակի օրվա՝ մայիսի 9-ի հետ, որը Ադրբեջանում պաշտոնական տոն է։

Քերիմլիի տեղակալ Սեյմիր Հազին OC Media-ին ասել է, որ ընդդիմադիր գործչի փաստաբանները դիմել են Պետական ​​անվտանգության ծառայությանը՝ Քերիմլիին թույլատրելու մասնակցել հուղարկավորությանը, բայց պատասխան չեն ստացել․ գործակալությունը տոնական օրերին չի աշխատել։

«Նրա փաստաբանները հեռագիր են ուղարկել, և տոնակատարության պատճառով աշխատանքային օրը սկսվել է մայիսի 12-ից, մենք սպասում ենք»,- ասել է նա։

Հազին նշել է, որ Քերիմլիի հոր հոգեհանգիստը տեղի կունենա մայիսի 15-ին․ «Հուսով եմ՝ նրան առնվազն թույլ կտան մասնակցել հոգեհանգստին»։

Թարգմանությունը՝ Էմմա Չոբանյանի