25.06.2026 | 12:01
Թրամփը գովաբանել է Զելենսկիի գործողությունները ՌԴ-ի հետ պատերազմում
Հրադադարն ավարտվել է. ռուսական զորքերը հարձակվել են Ուկրաինայի վրա, ՌԴ ՊՆ-ն էլ հայտնել է ավելի քան 30 ԱԹՍ-ների խոցման մասին
Քաղաքականություն
12.05.2026 | 13:48
Կեսգիշերից հետո, երբ լրացել է մայիսի 9-ից 11-ը հայտարարված հրադադարի ժամկետը, ռուսական ուժերը վերսկսել են անօդաչու թռչող սարքերով և հրթիռներով հարվածներն Ուկրաինայի տարածքում, գրում է Meduza-ն։
Անօդաչուները հարձակվել են, մասնավորապես, Կիևի վրա։ Օբոլոնի շրջանում խոցված ռուսական անօդաչուի բեկորներն ընկել են 20 հարկանի բնակելի շենքի տանիքին, հայտնել է Կիևի քաղաքային ռազմական վարչակազմի ղեկավար Տիմուր Տկաչենկոն։ Ազգային ոստիկանությունը հայտնել է հրդեհի մասին, որը բնակիչները մարել են ինքնուրույն։ Տուժածների մասին տեղեկություններ չկան։
Դնեպրոպետրովսկի մարզային վարչակազմի ղեկավար Ալեքսանդր Գանժայի խոսքով՝ Դնեպրոպետրովսկում ռուսական անօդաչու թռչող սարքի հարձակման հետևանքով մեկ մարդ վիրավորվել է, հրդեհ է բռնկվել և վնասվել են տրանսպորտային ենթակառուցվածքները։
Դոնեցկի մարզային ռազմական վարչակազմի ղեկավար Վադիմ Ֆիլաշկինը հայտարարել է, որ Դոնեցկի մարզում ռուսական զորքերի հարձակումների հետևանքով զոհվել է երեք մարդ, վեցը՝ վիրավորվել։
Խերսոնի մարզային ռազմական վարչակազմի ղեկավար Ալեքսանդր Պրոկուդինի տեղեկացմամբ էլ՝ Խերսոնի մարզում ռուսական զորքերի հարձակումների հետևանքով վիրավորվել է 12 մարդ, այդ թվում՝ մեկ երեխա։ Նա հայտարարել է, որ Խերսոնը և մարզի մի քանի այլ քաղաքներ ենթարկվել են անօդաչու թռչող սարքերի հարձակումների, ավիահարվածների և հրետակոծությունների։
Ռուսաստանի Պաշտպանության նախարարությունը, իր հերթին, հայտարարել է, որ Բելգորոդի, Վորոնեժի և Ռոստովի մարզերում կեսգիշերից մինչև առավոտյան ժամը 9:00-ն ընկած ժամանակահատվածում խոցվել է ուկրաինական 31 անօդաչու թռչող սարք։
ԱՄՆ նախագահ Դոնալդ Թրամփը մայիսի 8-ի երեկոյան հայտարարել էր Ռուսաստանի և Ուկրաինայի միջև ռազմական գործողությունների եռօրյա դադարի մասին՝ ընդգծելով, որ դա իր նախաձեռնությունն է, որին աջակցել են Մոսկվան ու Կիևը: Ռուսաստանի իշխանությունները հայտարարել էին, որ չեն ծրագրում շարունակել հրադադարը դրա ժամկետի ավարտից հետո։
Մայիսի 9-ից 11-ը Ռուսաստանը և Ուկրաինան միմյանց մեղադրել էին ռազմաճակատում հրադադարը խախտելու մեջ՝ պնդելով, որ ստիպված են եղել հայելային պատասխանել։ Սակայն երկու կողմերն էլ ձեռնպահ էին մնացել հեռահար անօդաչու թռչող սարքերի և հրթիռային կիրառումից։
Թարգմանությունը՝ Էմմա Չոբանյանի
