Ռազմավարական գործընկերություն ունենք ԵՄ-ի հետ և դեռ ամուր կապերը պահում ենք ՌԴ-ի հետ․ Միրզոյան․ ՏԵՍԱՆՅՈՒԹ

Մենք ռազմավարական գործընկերություն ենք հաստատել ԵՄ-ի հետ, շատ սերտ հարաբերություններ ունենք Հնդկաստանի հետ, ռազմավարական գործընկերություն ունենք Չինաստանի, Ղազախստանի հետ և դեռ մեր ամուր կապերը պահում ենք Ռուսաստանի հետ։ Այս մասին «Երևանյան երկխոսություն» համաժողովի պանելային քննարկման ժամանակ ասաց ՀՀ արտաքին գործերի նախարար Արարատ Միրզոյանը։ 

«Բայց նպատակը դիվերսիֆիկացնելն է այդ ուղիները, շուկաները և ընդհանուր առմամբ կապերը։ Մեր նպատակը սա է։ Ամփոփելով կամ ավելի կարճ եթե ասելու լինեմ՝ «ռազմավարական ինքնավարություն» եզրույթը, որը շատ մեծ տարածում ունի Հնդկաստանում և այլուր, մեզ համար դա հավասարակշռող, բալանսավորող մոտեցում ենք ընդունում շուկաների, գործընկերների»,- նշեց Միրզոյանը։

Արարատ Միրզոյանը նշել է, որ տասնամյակներ շարունակ հայկական քաղաքական միտքը հիմնված է եղել այն համոզմունքի վրա, որ թշնամական միջավայրում անհրաժեշտ է ունենալ «մեկ ուժեղ, մեծ եղբայր», ով կպաշտպանի երկիրը։

«Երբ ժամանակը եկավ և մենք իսկապես այդ պաշտպանության կարիքն ունեինք, մեծ ընկերոջ օգնությունը տեղ չհասավ։ Սա մեծապես փոխեց արտաքին քաղաքականության վերաբերյալ մեր տեսակետը ոչ միայն էլիտայի, այլև լայն հասարակության շրջանում»,- ընդգծեց նախարարը։

Ըստ Միրզոյանի՝ Հայաստանին արդեն հաջողվել է ինչ-որ չափով նվազեցնել քաղաքական, տնտեսական և էներգետիկ կախվածությունը մեկ կենտրոնից  և զգալիորեն ընդլայնել գործընկերների շրջանակը։ ԱԳ նախարարը հատուկ խոսել է նաև TRIPP-ի մասին, նշել, որ ծրագիրը ներառում է երկաթուղիներ, համացանցային մալուխներ և միգուցե ապագայում՝ նավթի, գազի խողովակաշարեր։ 

Մանրամասները՝ տեսանյութում։