Քաղաքականություն
03.05.2017 | 15:44
Պոլսո Հայոց պատրիարքի տեղապահի պաշտոնում ընտրված Գարեգին արքեպիսկոպոս Բեկչյանը հայտարարել է, որ եթե Պոլսո Հայոց պատրիարքի ընտրությունների շուրջ ստեղծված ճգնաժամում դրական տեղաշարժ չնկատվի, ապա հնարավոր է մոտ ապագայում հրաժարական տա։ Այս մասին Բեկչյանն ասել է«Հայ Ձայն»-ի հետ զրույցում:
Բեկչյանը նշել է, որ իրավիճակը շարունակում է անկայուն մնալ: «Խնդրի լուծումը Թուրքիայի կառավարության ձեռքում է,- ասել նա, ապա շարունակել,- նախքան տեղապահ ընտրվելս՝չէի ենթադրում, որ նման իրավիճակում կհայտնվեմ, և եթե կառավարական մարմինների հետ բանակցությունները դրական արդյունքներ չտան` ես կարող եմ հրաժարական տալ»:
Նշենք, որ Բեկչյանը նաև Գերմանիայի հայ համայնքի հոգևոր առաջնորդն է:
Հիշեցնենք, որ Պոլսո պատրիարք Մեսրոպ Մութաֆյանը կոմայի մեջ է գտնվում 2008թ.-ից և փաստացի չի կարող կատարել պատրիարքի իր լիազորությունները։ Նրա փոխարեն այդ լիազորությունները կատարում էր Արամ արքեպիսկոպոս Աթեշյանը, որն ընտրվել է ոչ թե համայնքի, այլ պետության կողմից:
Մարտի 15-ին Ստամբուլում տեղի ունեցավ Պոլսո Հայոց պատրիարքի տեղապահի ընտրություն, որում համոզիչ հաղթանակ տարավ Բեկչյանը, սակայն Ստամբուլի նահանգապետարանն անակնկալ կերպով միջամտեց ընտրություններին: Ստամբուլի նահանգապետի տեղակալը նախքան պատրիարքարանում ընտրությունների սկսվելը գրություն է ուղարկել, որն իրավաբանորեն անհնար է համարում պատրիարքական ընտրությունների գործընթացի մեկնարկը: Այս գրությունը Պոլսո Հայոց պատրիարքի տեղապահի ընտրություններից անմիջապես հետո պատրիարքարանի հոգևորականներին է ներկայացրել տեղապահի ընտրություններում պարտված փոխանորդ Արամ արքեպիսկոպոս Աթեշյանը և հայտարարել, որ չի հեռանա տեղապահի պաշտոնից:
