27.04.2026 | 20:27
ՀՔԱՎ-ը ահազանգում է ընտրովի արդարադատության մասին․ քրեական վարույթ է նախաձեռնվել միայն Ուրիխանյանի հրապարակումների հիմքով
«Կրասնոդարի» մարզիչը բացատրել է՝ ինչու է երկրորդ խաղում անընդմեջ փոխարինել Էդուարդ Սպերցյանին
27.04.2026 | 19:15
«Կրասնոդարի» գլխավոր մարզիչ Մուրադ Մուսաևը պատմել է, թե ինչու է երկրորդ խաղում անընդմեջ փոխարինել թիմի ավագ, Հայաստանի ազգային հավաքականի կիսապաշտպան Էդուարդ Սպերցյանին։ Ռուսաստանի Պրեմիեր լիգայի 27-րդ տուրում «Կրասնոդարը» սեփական խաղադաշտում 2։1 հաշվով հաղթել էր Մախաչկալայի «Դինամոյին»։ Սպերցյանը խաղը սկսել էր մեկնարկային կազմում, 36-րդ րոպեին վրիպել էր 11-մետրանոցից, իսկ 82-րդ րոպեին փոխարինվել էր։
«Սպերցյանը պատրաստ է խաղալ 90 րոպե, բայց շատ բարդ օրացույց է։ Նրա դիրքը շատ էներգատար է։ Նա այնպիսի խաղացող է, որը մեծ աշխատանք է կատարում ամեն խաղում՝ հանդես գալով 10 համարի դիրքում։ Իմ կարծիքով, անհրաժեշտ էր թարմացնել միջին գիծը, բայց չէի ցանկանում հեռացնել Լենինիին ու Կրիվցովին։ Դա էր անհրաժեշտ թիմին։
Սպերցյանը մեր առաջատարն է, մեր առաջնության լավագույն խաղացողներից մեկը, և նա գործնականում միշտ խաղում է առանց փոխարինման։ Պետք չէ ուշադրություն դարձնել, որ այս անգամ նա խաղաց 9 րոպե քիչ»,– Մուրադ Մուսաևի խոսքը մեջբերում է Championat.com-ը։
Ընթացիկ մրցաշրջանում Էդուարդ Սպերցյանը «Կրասնոդարի» կազմում մասնակցել է 37 հանդիպման, դարձել 13 գոլի ու 16 գոլային փոխանցման հեղինակ։
