Մոսկվայում Գերմանիայի դեսպանը կանչվել է Ռուսաստանի ԱԳՆ

Մոսկվայում Գերմանիայի դեսպան Ալեքսանդր Գրաֆ Լամբսդորֆ կանչվել է ՌԴ արտաքին գործերի նախարարություն, հայտնել է գերատեսչության մամուլի ծառայությունը։ Լամբսդորֆի մամուլի քարտուղարը հաստատել է տեղեկությունըdpa լրատվական գործակալության հետ զրույցում, գրում է DW-ի ռուսական ծառայությունը։

Ռուսաստանը պնդում է, որ Բունդեսթագի անդամ Ռոդերիխ Քիզեվետտերը, իբր, Կիևում հանդիպել է «Իչկերիայի Չեչենական Հանրապետության» Ահմեդ Զակաևի հետ և աջակցություն է հայտնել դրա «հակառուսական գործունեությանը»։ Կազմակերպությունը Ռուսաստանում ահաբեկչական է հայտարարված։

«Մոսկվան գերմանացի խորհրդարանականի և հանցագործների միջև այս հանդիպումը համարում է անհերքելի ապացույց այն բանի, որ գերմանական իշխանությունները մտադիր են միջամտել Ռուսաստանի ներքին գործերին և սպառնալիքներ ստեղծել նրա ազգային անվտանգության համար»,- ասվում է ռուսական կողմի հաղորդագրության մեջ։

Գերմանիայի ԱԳՆ խոսնակը Ռուսաստանի մեղադրանքներն անվանել է «լիովին անհիմն»։ Լամբսդորֆն ինքը դեռևս չի մեկնաբանել իրավիճակը։

«Իհարկե, ես կհետևեմ կանչին։ Ես քիչ հավանական եմ համարում, որ ռուսական կողմը կկարողանա հիմնավորել մեղադրանքները»,- ՌԴ ԱԳՆ ժամանելիս ասել է դիվանագետը։

Լամբսդորֆն այս ամռանը կստանձնի Իսրայելում Գերմանիայի դեսպանի պաշտոնը։

Ռուսաստանի կողմից Ուկրաինա լայնածավալ ռազմական ներխուժման սկսվելուց հետո Ռուսաստանի և Գերմանիայի հարաբերությունները զգալիորեն վատթարացել են։ Գերմանիան դարձել է Ուկրաինայի ամենակարևոր դաշնակիցներից մեկը, որը պաշտպանվում է իր հարևանի ագրեսիայից։

2026 թվականի մարտին Գրոզնիի Շեյխ-Մանսուրովսկի շրջանային դատարանը որոշում է կայացրել արգելել «Իչկերիայի Չեչենական Հանրապետության» գործունեությունը ՌԴ-ում՝ այն որակելով ահաբեկչական կազմակերպություն։ Ռուսաստանի Դաշնային անվտանգության ծառայությունը (ԱԴԾ) կարծում է, որ դրա անդամները կռվում են ռուսական բանակի դեմ՝ Ուկրաինայի զինված ուժերի կողմից, և ներգրավված են եղել դիվերսիաների մեջ Ռուսաստանի Կուրսկի և Բելգորոդի մարզերում։

«Իչկերիայի Չեչենական Հանրապետությունը» ինքնահռչակված անկախ հանրապետություն է, որը գոյություն է ունեցել Չեչնիայի տարածքում 1993-ից 1999 թվականներին: Այն լուծարվել է Երկրորդ չեչենական պատերազմի ժամանակ: Պատերազմից հետո Չեչնիայի ղեկավար դարձավ Ախմատ Կադիրովը՝ տարածաշրջանի ներկայիս ղեկավար Ռամզան Կադիրովի հայրը:

Թարգմանությունը՝ Էմմա Չոբանյանի