Ըմբշամարտի ԵԱ․ Արսեն Հարությունյանը կիսաեզրափակիչում պարտվեց Զաուր Ուգուևին․ ՏԵՍԱՆՅՈՒԹ

Արսեն Հարությունյանը (61 կգ) բրոնզե մեդալի համար գոտեմարտ կանցկացնի Ալբանիայի մայրաքաղաք Տիրանայում անցկացվող ազատ ոճի ըմբշամարտի Եվրոպայի առաջնությունում։

Կիսաեզրափակիչում հայ ըմբիշը մրցեց Տոկիոյի Օլիմպիական խաղերի ոսկե մեդալակիր, աշխարհի ու Եվրոպայի գործող չեմպիոն Զաուր Ուգուևի հետ ու պարտվեց տուշեով։ Առաջին մրցափուլում 26-ամյա Հարությունյանն ավելի ակտիվ էր ու հաղթեց 3։0 հաշվով։ Երկրորդ մրցափուլում ռուսաստանցի ըմբիշը կատարեց 4 միավորանոց հնարք ու հաղթեց տուշեով։

Ապրիլի 26-ին Հայաստանի ներկայացուցիչը բրոնզե մեդալը կվիճարկի Բելառուսի ներկայացուցիչ Դմիտրի Շամելայի հետ։

Եվրոպայի քառակի չեմպիոն, աշխարհի առաջնության քառակի բրոնզե մեդալակիր Արսեն Հարությունյանը պայքարը սկսել էր որակավորման փուլից, որտեղ ժամանակից շուտ 11։0 հաշվով հաղթել էր Հյուսիսային Մակեդոնիայի ներկայացուցիչ Վլադիմիր Եգորովին, իսկ քառորդ եզրափակիչում 11։1 հաշվով պարտության էր մատնել ուկրաինացի Կամիլ Կերիմովին։

ԵԱ-ի երկրորդ մրցումային օրը պայքարի մեջ մտած Հայաստանի մյուս 3 ներկայացուցիչներ Նարեկ Հարությունյանը (74 կգ), Մուշեղ Մկրտչյանը (92 կգ) և Խաչատուր Խաչատրյանը (125 կգ) պարտություն են կրել։

Ապրիլի 25-ին բրոնզե մեդալի համար գոտեմարտելու են Մանվել Խնձրցյանը (57 կգ), 2023թ․ Եվրոպայի չեմպիոն Վազգեն Թևանյանը (65 կգ) և Հրայր Ալիխանյանը (79 կգ)։ Խնձրցյանի մրցակիցը կլինի Սերբիան ներկայացնող Ազամատ Տուսկաևը, Թևանյանն ուժերը կչափի ադրբեջանցի Ռաշիդ Բաբազադեի հետ, իսկ Ալիխանյանը կմրցի Ֆրանսիայի ներկայացուցիչ Զելիմխան Խաջիևի հետ։