Տնտեսություն
20.11.2018 | 14:30Գազի և էլեկտրաէներգիայի սակագների հարցը քննելու նպատակով ստեղծված ԱԺ քննիչ հանձնաժողովի նախագահ Միքայել Մելքումյանն ամփոփել է հանձնաժողովի մեկ ամսվա աշխատանքը և եկել այն եզրակացության, որ այդ մեկ ամսվա ընթացքում հանձնաժողովի աշխատանքը բավականին արդյունավետ է եղել։
Նրա խոսքով՝ հանձնաժողովի գործունեությունը կշարունակվի, քանի որ դեռ բազմաթիվ հարցեր կան ուսումնասիրելու։
«Առաջինն անխուսափելի տեխնոլոգիական կորուստներն են, որոնք 6.69 տոկոս են։ Սա շատ ավելի բարձր է, քան 2002-2016 թվականները գործող 5.37 տոկոսի։ 1 տոկոս կորուստը համարժեք է մոտ 20 միլիոն խորանարդ մետր գազի»,–նշել է Մելքումյանը։
Միքայել Մելքումյանը նաև նշեց, որ գազաբաշխման համակարգում այդ կորուստների ծավալը կազմում է ընդամենը 2 տոկոս, իսկ մայրուղային համակարգում կազմում է սակագնի մեջ 4.6, փաստացի՝ 4.3 տոկոս։
«Սա սարսափելի բարձր թիվ է։ 4 տոկոսից ավելի կորուստը լինում է մոտավորապես 90 միլիոն խմ գազ»,-ասաց հանձնաժողովի նախագահը։
Մելքումյանն առանձնացրեց նաև գազի և էլեկտրաէներգիայի մասով միջին սակագները և նշեց․
«Գազը սահմանին ստանում ենք 150 դոլար, իսկ սպառողին այն հասնում է 2 անգամ թանկ։ Բացի այդ, մենք ունենք սոցիալական խմբեր, որոնց համար 139 դրամի փոխարեն սակագինը սահմանվել է 80 դրամ, ջերմոցների համար սակագինը 100 դրամ է։ Այսինքն՝ սակագները տարբեր խմբերի համար դիվերսիֆիկացված են»,–պարզաբանեց Մելքումյանը։
Մելքումյանն առանձնացրեց ևս մեկ խնդիր և շեշտեց, որ գազի փոխանցման և բաշխման համակարգերը պետք է բաժանվեն, քանի որ գազի բաշխումը պետք է իրականացվի մրցույթի միջոցով` ընտրված մեկ այլ, ավելի ցածր եկամուտով օպերատորի կողմից:
«Ամբողջ աշխարհը գնում է ազատականացման ճանապարհով: Փոխանցման և բաշխման բաժանումը համաշխարհային ճանաչում ունեցող գործիքներից է», – ասաց նա:
Մանրամասները՝ տեսանյութում։
