Սամվել Կարապետյանի պաշտպաններն առարկեցին դատական նիստի նկարահանման դեմ

«Ուժեղ Հայաստան» կուսակցության առաջնորդ Սամվել Կարապետյանի պաշտպանները առարկեցին դատական նիստի տեսանկարահանման դեմ: Ավելին, պաշտպաններից Արմեն Գորոյանը ոչ միայն տեսանկարահանմանը, այլ նաև նիստի ձայնագրմանն էր դեմ՝ չնայած այն հանգամանքին, որ թե՛ Սահմանադրությամբ, թե՛ Քրեական դատավարության օրենսգրքով առկա չէ նիստի ձայնագրման արգելք:

Պաշտպաններից Արամ Վարդևանյանը որպես տեսանկարահանմանն առարկելու դիրքորոշման հիմնավորում խոսեց այն մասին, որ նախընտրական շրջան է և Սամվել Կարապետյանի նկատմամբ «քաղաքական հետապնդման գործով նիստի տեսանկարահանումն ավելորդ շահարկումների առիթ կարող է ստեղծել»: Դատավոր Դոլմազյանը դիտարկեց, որ Արամ Վարդևանյանը այլ գործերով, որոնք նույնպես որակել է որպես քաղաքական, նույն դիրքորոշումը չի հայտնել:

Գործի նկարահանմանն առարկեցին նաև գործով մյուս երկու մեղադրյալները, ընդ որում՝ հետաքրքիր էր այն հանգամանքը, որ նրանցից մեկն ի սկզբանե դիրքորոշում էր հայտնել, որ դեմ չէ նկարահանմանը, և միայն այն բանից հետո, երբ Կարապետյանի պաշտպաններն առարկեցին նկարահանման դեմ նա ևս փոխեց դիրքորոշումը:

Քրեական դատավարության օրենսգրքի համաձայն՝ եթե մեղադրյալն առարկում է նկարահանման դեմ, ապա նկարահանում իրականացվել չի կարող, ուստի՝ դատարանն արգելում է նիստի նկարահանումն ու ուղիղ հեռարձակումը: Այսպիսով՝ պաշտպանական կողմը, որը մոտ մեկ տարի շարունակ պնդում է, որ Սամվել Կարապետյանը քաղաքական հետապնդման է ենթարկվում, չի ցանկանում, որ տեսանկարահանմամբ լուսաբանվի Սամվել Կարապետյանի գործը, որպեսզի հանրությունը ևս համոզվի իրենց պնդման մեջ:

Արաքս Մամուլյան