Թուրքիայի ընդդիմության նախկին առաջնորդը դատապարտվել է ազատազրկման՝ Էրդողանին վիրավորելու համար

Թուրքական դատարանը ընդդիմության նախկին առաջնորդ Քեմալ Քըլըչդարօղլուին դատապարտել է 11 ամիս 20 օր ժամկետով ազատազրկման՝ երկրի նախագահի Ռեջեփ Թայիփ Էրդողանին վիրավորելու մեղադրանքով, գրում է Turkish Minute-ը։

Մերսինի 3-րդ քրեական առաջին ատյանի դատարանը Քըլըչդարօղլուին մեղավոր է ճանաչել Էրդողանի մասին մի քանի տարվա ընթացքում իր ելույթներում արված արտահայտությունների համար։ Դատարանի որոշումը կարող է բողոքարկվել։

Գործի հիմքում Քըլըչդարօղլուի 2014 թվականին Մերսինում կայացած հանրահավաքի ժամանակ արված մեկնաբանություններն են, երբ Էրդողանը վարչապետ էր, ինչպես նաև 2016 թվականին Էդիրնեում  և ավելի ուշ խորհրդարանական խմբի նիստերի ժամանակ ունեցած ելույթները։

Քըլըչդարօղլուն, որը տասնամյակից ավելի ղեկավարել է Ժողովրդահանրապետական կուսակցությունը (CHP) և 2023 թվականին առաջադրվել էր որպես ընդդիմադիր դաշինքի նախագահի թեկնածու, վաղուց է մեղադրում Էրդողանին կոռուպցիայի մեջ: Մեղադրանքները մասամբ կապված են նրա հայտարարությունների հետ, որոնք նա արել է 2013 թվականի դեկտեմբերի 17-25-ը կոռուպցիոն հետաքննություններից հետո, երբ նա Էրդողանին անվանել է «բաշչալան» («գլխավոր գող»):

Էրդողանը հերքել է մեղադրանքները՝ հետաքննությունները որակելով որպես Գյուլենական շարժման կողմից կազմակերպված դավադրություն, որին նա նախկինում մեղադրում էր իր կառավարությունը տապալելու փորձի մեջ: Դատախազները հետաքննությունը են սկսել 2024 թվականին, երբ ավարտվեց Քըլըչդարօղլուի՝ որպես CHP-ի առաջնորդի և խորհրդարանի անդամի պաշտոնավարումը։ Նա ցուցմունք է տվել 2024 թվականի նոյեմբերին՝ Անկարայի դատարանում։ Քըլըչդարօղլուն ասել էր, որ չի զղջացել իր խոսքերի համար, երբ սուր քննադատության ենթարկել Էրդողանի կառավարությանը՝ մեղադրելով  կոռուպցիայի, ավտորիտարիզմի և տնտեսական վատ կառավարման մեջ։

«Ես այստեղ կանգնած եմ ոչ թե որպես գողության կամ յուրացման մեջ մեղադրվող անձ, այլ որպես մեկը, ով համարձակվեց գողին գող անվանել»,- հայտարարել էր նա։

Մեղադրողները պահանջել էին մինչև 11 տարվա ազատազրկում և քաղաքական գործունեության արգելք։ Դատարանը, ի վերջո, նրան դատապարտել է 11 ամիս 20 օրվա ազատազրկման։

Քըլըչդարօղլուի փաստաբան Ջելալ Չելիքը քննադատել է որոշումը՝ այն անվանելով անօրինական և քաղաքական դրդապատճառներով՝ լրատվամիջոցներին ասելով, որ պաշտպանությունը կբողոքարկի այն, միաժամանակ, վստահություն հայտնելով, որ որոշումը կչեղարկվի։

2023 թվականի նախագահական ընտրություններում պարտվելուց հետո Քըլըչդարօղլուն հեռացվեց CHP-ի ղեկավարի պաշտոնից, բայց շարունակում է մնալ ազդեցիկ դեմք ընդդիմադիրների շրջանում։

Դատավճիռը Թուրքիայում նախագահին վիրավորելու մեղադրանքով հարուցված մի շարք գործերի մեջ վերջինն է, որը քրեական հանցագործություն է Թուրքիայի քրեական օրենսգրքի 299-րդ հոդվածով։

Թարգմանությունը՝ Էմմա Չոբանյանի