27.06.2026 | 01:05
ԱԱ-2026. Դեմբելեի հեթ-տրիկը հաղթանակ բերեց Ֆրանսիային, Սենեգալը խփեց 5 գոլ. ՏԵՍԱՆՅՈՒԹ
Երևանում կմեկնարկի «Արմմոնո Plus» թատերական փառատոնը
Մշակույթ
19.11.2018 | 15:12
ՀՀ մշակույթի նախարարության աջակցությամբ, «Արմմոնո մշակութային փառատոն» հասարակական կազմակերպության նախաձեռնությամբ՝ ս. թ. նոյեմբերի 19-ից դեկտեմբերի 10-ը Երևանում կմեկնարկի «Արմմոնո Plus» թատերական փառատոնը («Արմմոնո» միջազգային թատերական փառատոնի հավելվածն է):
Փառատոնի բացումը կկայանա նոյեմբերի 19-ին՝ ժամը 15:00-ին, «ԼատինԱրտ» ստուդիայում (Հասցե` Աբովյան 41/4):
Փառատոնի ծրագրում ներառված են բազմատեսակ մոնոներկայացումներ` մոնոպար, մոնոդրամա, մոնոօպերա: «Արմմոնո Plus» թատերական փառատոնի շրջանակում կցուցադրվի 9 մոնոներկայացում. Նարեկ Բաղդասարյան՝ «ՀամլետMachin» (Արմմոնո-Տրիումֆ), Տաթև Ղազարյան` «Սովորական օր» (Արմմոնո-Տրիումֆ), Նորա Բադալյան` «Լեդի Մակբեթ» (Արմմոնո-Տրիումֆ), Արմեն Քուշկյան՝ «Նաստասիայի դերում իշխան Լև Նիկոլաևիչ Միշկին» (Արմմոնո-Տրիումֆ), Վալենտինա Դավիթավյան՝ «Ուղղակի Ֆրիդա», Դավիթ Աբրահամյան՝ «Թթվածին», Աքսաննա Բաբաջանյան` «Ես սպասում եմ քեզ սիրելիս» (Գորիս), Ռուզաննա Պողոսյան՝ «Ժաննա դ՛Արկ» (Գավառ) և Հասմիկ Հարությունյան` «Համբարձման գիշեր»:
«Արմմոնո Plus» փառատոնի շրջանակում կանցկացվի նաև «Արմմոնո-հանդիպում» կրթական ծրագիրը: Հանդիպումները կկայանան «Լոֆտում» (հանդիպում հոգեբան Եվա Օհանյանի հետ` «Թատրոնը հոգեբանի աչքերով» թեմայով, հանդիպում բեմանկարիչ Վիկտորիա Ռիեդո Հովհաննիսյանի հետ (Հայաստան-Շվեյցարիա)` «Խոսենք բեմանկարչի աշխատանքի մասին» թեմայով, հանդիպում ՀՀ վաստակավոր արտիստ Նարինե Գրիգորյանի հետ` «Խաղում ենք մոնոներկայացում» թեմայով) և «ԼատինԱրտ» ստուդիայում (հանդիպում Հայաստանի սպորտային պարերի բազմակի չեմպիոն ու մրցանակակիր Արտակ Զախարյանի հետ` «Շարժվի´ր ռիթմով» թեմայով):
«Արմմոնո Plus» թատերական փառատոնի ներկայացումները կցուցադրվեն Փոքր թատրոնում, ՀԹԳՄ-ում, Հ. Թումանյանի տուն-թանգարանում, Զուլում և Մուշեղ Գրիգորյանների արվեստանոցում և «Լոֆտում»։
Ներկայացումների մուտքն անվճար է:
