25.04.2026 | 21:33
Մանվել Խնձրցյանը և Վազգեն Թևանյանը տպավորիչ հաղթանակներով դարձան ԵԱ-ի բրոնզե մեդալակիրներ. ՏԵՍԱՆՅՈՒԹ
Իրանը կարող էր հիբրիդային պատերազմ սկսել Եվրոպայի երկրների դեմ․ FT
Քաղաքականություն
05.04.2026 | 19:38
Եվրոպական քաղաքներում հաճախացած հարձակումները սինագոգների, հրեական բարեգործական կազմակերպությունների և ամերիկյան բանկերի վրա կարող են վկայել Իրանի կողմից Եվրոպայի դեմ հիբրիդային պատերազմի մեկնարկի մասին։ Այս մասին կիրակի՝ ապրիլի 5-ին, գրում է Financial Times-ը՝ հղում անելով Ջուլիան Լանչեսին Միջազգային ահաբեկչության դեմ պայքարի կենտրոնից (ICCT), որը գտնվում է Հաագայում։
Խոսքը «Ասխաբ ալ-Յասմին» խմբավորման հայտարարությունների մասին է, որը իր վրա է վերցրել Լոնդոնում հրեական «Հացալա» բարեգործական կազմակերպության շտապօգնության մեքենաների հրկիզման, Բելգիայի Լիեժ քաղաքում սինագոգի վրա հարձակման և Փարիզում Bank of America բանկի մասնաճյուղերի վրա հարձակումների պատասխանատվությունը։
Փորձագետի խոսքով՝ Իրանի իշխանությունների հետ, հավանաբար, կապ ունեցող այս խմբավորումը հայտնվել է մեկ ամսից էլ քիչ առաջ․ մինչև մարտի 9-ը «Ասխաբ ալ-Յասմին»-ը որևէ հետք չէր թողել՝ ոչ ինտերնետում, ոչ էլ դրանից դուրս։
«Ոչ մի տեղից ի հայտ եկած խմբավորումը անսովոր է»,- նշել է Լանչեսը Financial Times-ին տված հարցազրույցում։ Նրա կարծիքով՝ նման խմբավորումը կարող է լինել Իրանի հետախուզության նախագիծ՝ «քաոս սերմանելու և եվրոպական երկրների հասարակությունները ապակայունացնելու» նպատակով։
«Ասխաբ ալ-Յասմին»-ը հայտարարել է Մեծ Բրիտանիայում, Ֆրանսիայում և Նիդերլանդներում իրականացված հարձակումների մասին։
Մարտի 9-ին խմբավորումը իր տելեգրամյան ալիքում հայտարարել է «աշխարհով մեկ ԱՄՆ-ի և Իսրայելի դեմ ռազմական գործողության» մեկնարկի մասին։ Երկու օր անց այն իր վրա է վերցրել Ֆրանսիայում սինագոգի հրկիզման պատասխանատվությունը, իսկ ավելի ուշ՝ նաև Փարիզում Bank of America-ի գրասենյակի վրա հարձակումը։
Մարտի 13-ին Նիդերլանդներում հարձակում է իրականացվել Ռոտերդամի սինագոգի վրա, հաջորդ օրը՝ Ամստերդամի հրեական դպրոցի վրա։ Մարտի 16-ին «Ասխաբ ալ-Յասմին»-ը հայտարարել է, որ հարձակվել է Հաագայում գտնվող Bank of New York Mellon ամերիկյան բանկի մասնաճյուղի վրա։ Մարտի 20-ին երկրի իշխանությունները կանխել են Հեմստեդում սինագոգի վրա հարձակումը։
Մարտի 23-ին Լոնդոնում հրկիզվել են հրեական «Հացալա» ոչ առևտրային կազմակերպության չորս մեքենաներ, որը անվճար շտապ բժշկական օգնություն է տրամադրում։
«Ասխաբ ալ-Յասմին»-ի կողմից հայտարարված հարձակումների արդյունքում Նիդերլանդներում ձերբակալվել է 10 մարդ, Ֆրանսիայում՝ 4, իսկ Մեծ Բրիտանիայում՝ ևս 3։ Բոլոր ձերբակալվածները երիտասարդներ են՝ 14-ից 23 տարեկան։
