Ինձ ասում են՝ Աննա Հակոբյանին նկարել եք, իսկ տիկին Բելլայի՞ն, դա ի՞նչ հարց է, շոու մի՛ փնտրեք. Թոքմաջյան. ՏԵՍԱՆՅՈՒԹ

«Ես գտա իմ Սևակին, ի՞նչն եմ փոխել, ոչ մի բան էլ չեմ փոխել, լույս ու ստվերի հարց եմ լուծել, ինձ համար զարմանալի էր, անհասկանալի՝ ինչն է խնդիրը, հանելուկ մնաց՝ իրոք դուր չէր եկել մարդկանց, թե դա իմ հանդեպ թշնամություն էր, ինձ ցավեցնելու համար էր»,- Factor TV-ի հետ զրույցում նշում է ՀՀ ժողովրդական նկարիչ, քանդակագործ Լևոն Թոքմաջյանը՝ անդրադառնալով բուռն քննադատությունների արժանացած, Սևակի՝ իր հեղինակած քանդակին։ Ասում է՝ ձևափոխել է արձանը, այն շուտով կտեղադրվի Անդրանիկի փողոցում, մասնավոր տարածքում։

Վերջերս «Իմ քայլը» հիմնադրամի գործադիր տնօրեն Աննա Հակոբյանն այցելել էր քանդակագործչի արվեստանոց։ Ասում է՝ ինքը հրավիրել է, Աննա Հակոբյանն էլ չի մերժել․ «Նա եկել է, ես էլ իրեն նկարել եմ, ինձ միշտ գրավել է իր ժպիտը․․․Նկարն իրեն դուր եկավ, նվիրեցի։ Արտառոց բան չկա։ Եղան մարդիկ, որոնք փորձեցին քաղաքական երանգ հաղորդել դրան, ինձ ասում են՝ դուք տիկին Բելլային՝ Քոչարյանի կնոջը, նկարե՞լ եք։ Դա ի՞նչ հարց է։ Թող ոչ ոք շոու չփնտրի»,- նշում է Լևոն Թոքմաջյանը՝ հավելելով, որ քաղաքական որևէ քննարկում Աննա Հակոբյանի հետ չեն ունեցել։

Հետաքրքրվեցինք՝ ինչպես է զգում Լևոն Թոքմաջյանը՝ որպես քաղաքացի, նախընտրական Հայաստանում․ «Շատ վատ եմ զգում, ժողովուրդը պառակտված է, բաժանված, օրական մեկը մեկին խփում, սպանում է, այս թոհուբոհի մեջ ոչինչ չեմ կարողանում հասկանալ, թացն ու չորը խառնվել է իրար։ Ես կուսակցական չեմ․ իմ կուսակցությունը ժողովուրդն է և սիրուն կանայք»։

Քանդակագործը չի կարողանում հստակ ասել՝ Հայաստանում ժողովրդավարություն կա, թե ոչ․ «Ուզում եմ հավատալ, բայց տեսնում եմ, որ կալանավորված մարդիկ կան, ինչի՞ համար, որ ինչ-որ ռեպլիկ են թողել, ուրիշ խոսք են ասել, դա ժողովրդավարություն չի․․․»։

Մանրամասները՝ տեսանյութում։

Աննա Բաբաջանյան