Էրդողանն Իսրայելին մեղադրել է Իրանի դեմ պատերազմի համար

Թուրքիայի նախագահ Ռեջեփ Թայիփ Էրդողանը մեղադրել է Իսրայելին՝ որպես տարածաշրջանում պատերազմի «հիմնական պատասխանատու կողմ»՝ հայտարարելով, որ «թափված արյան յուրաքանչյուր կաթիլը ծառայում է Իսրայելի վարչապետ Բենիամին Նեթանյահուի քաղաքական գոյատևման երկարաձգմանը»։ Նա նաև հավելել է, որ Թուրքիան «վճռական է՝ հեռու մնալ այս կրակից»։

«Այս անօրինական պատերազմի համար, որը ոչ միայն մեր տարածաշրջանը վերածել է այրվող վայրի, այլև տնտեսական բեռ է դրել ամբողջ մարդկության ուսերին, հիմնական պատասխանատուն Իսրայելի կառավարությունն է։ Չպետք է մոռանալ, որ այս պատերազմում թափված արյան յուրաքանչյուր կաթիլը կլինի փրկարար օղակ, որը կերկարացնի Նեթանյահուի քաղաքական կյանքը»,- Թուրքիայի իշխող «Արդարություն և զարգացում» կուսակցության  խորհրդարանական խմբակցության նիստում ասել է Էրդողանը։

Նա հաստատել է, որ Թուրքիայի արտգործնախարարը մասնակցել է Իսլամաբադում Սաուդյան Արաբիայի, Եգիպտոսի և Պակիստանի արտգործնախարարների հետ քառակողմ հանդիպմանը, որի ընթացքում բարձրաձայնել է իր մտահոգությունները և քննարկել պատերազմը դադարեցնելու համատեղ քայլերը։ Էրդողանն ասել է, որ Անկարայի դիրքորոշումը հստակ է՝ «արյունահոսությունը պետք է դադարի, զենքերը պետք է լռեն, և եթե կա հույս, որ խնդիրները կարող են լուծվել դիվանագիտական ​​ճանապարհով, պետք է հետապնդել այն»։

Էրդողանը շեշտել է, որ էներգետիկայի, տրանսպորտի և ենթակառուցվածքների դեմ ուղղված պատասխան հարվածները տարածաշրջանային ներքին հակամարտություններ են առաջացնում:

«Ակնհայտ է, որ Իրանի հետ պատերազմը չի ծառայում համաշխարհային խաղաղության տեսլականին, ընդհակառակը, այն վտանգի տակ է դնում այդ տեսլականը։ Մարդկության համար այս թակարդից դուրս գալու ճանապարհը երկխոսությունն ու դիվանագիտությունն է։ Մեր ցանկությունն է, որ խաղաղությունը գերիշխի, նախքան ավելի շատ արյուն թափվի: Մենք կպայքարենք դրա համար»,- ասել է Թուրքիայի ղեկավարը։

Թարգմանությունը՝ Էմմա Չոբանյանի