21.04.2026 | 14:50
Մագյարը սպառնացել է պաշտոնանկ անել Հունգարիայի նախագահին, եթե նա հրաժարական չտա
Պենտագոնի ղեկավարը հայտարարել է, թե «առաջիկա օրերը վճռորոշ կլինեն» Իրանի դեմ պատերազմում
Քաղաքականություն
31.03.2026 | 18:34
ԱՄՆ պատերազմի նախարար Փիթ Հեգսեթը և Միացյալ շտաբի պետ, գեներալ Դեն Քեյնը հայտարարել են, որ «առաջիկա օրերը վճռորոշ կլինեն» Իրանի հետ պատերազմում, գրում է CBS News-ը։
«Իրանը գիտի դա, և գրեթե ոչինչ չի կարող անել ռազմական առումով։ Ամերիկյան կրակային հզորությունը միայն աճում է, մինչդեռ Իրանինը՝ նվազում։ Ընդամենը մեկ ամսում մենք սահմանեցինք պայմանները»,- հայտարարել է Հեգսեթը։
Երեքշաբթի առավոտյան ԱՄՆ նախագահ Դոնալդ Թրամփը CBS News-ի լրագրողին ասել էր, որ «դեռևս» պատրաստ չէ հրաժարվել փորձից՝ Իրանին ստիպել վերաբացել Հորմուզի նեղուցը։ Նա հիասթափություն է հայտնել, որ այլ երկրներ ռազմական միջոցներ չեն ուղարկել՝ Իրանի դեմ ԱՄՆ-ի և Իսրայելի պատերազմին միանալու համար։
Հորմուզի նեղուցի վերաբերյալ Հեգսեթն ասել է, որ «այսօր ավելի շատ նավեր են անցնում, քան նախկինում», հավելելով, որ ԱՄՆ նախագահը «հստակ ասել է Իրանին. «Բացեք այն բիզնեսի համար, հակառակ դեպքում՝ մենք ունենք տարբերակներ»։
Նա նաև ասել է, որ «եթե Իրանն իմաստուն լինի, գործարք կկնքի»։ Ըստ Հեգսեթի՝ ԱՄՆ նախագահը պատրաստ է գործարք կնքել, և դրա պայմանները հայտնի են իրանցիներին։ Հակառակ դեպքում, նրա պնդմամբ, ԱՄՆ-ը «կշարունակի ավելի մեծ ինտենսիվությամբ»։
«Մեր համատեղ ուժերը շարունակում են կենտրոնանալ մեր ռազմական նպատակների վրա, քանի որ մենք համակարգված կերպով շարունակում ենք քայքայել և ոչնչացնել Իրանի՝ իր սահմաններից դուրս ուժ տարածելու և կայունությունը սպառնալու ունակությունը»,- իր հերթին ասել է Դեն Քեյնը։
Փիթ Հեգսեթը նաև հայտարարել է, որ ԱՄՆ-ը չի բացառում Իրան զորքեր ուղարկելու հնարավորությունը։Ըստ նրա՝ ԱՄՆ-ը հանձնառու է հակամարտությունը սեփական պայմաններով դադարեցնելու դիրքորոշմանը։
Միևնույն ժամանակ, ԱՄՆ կենտրոնական հրամանատարությունը երեքշաբթի վաղ առավոտյան հայտարարել է, որ ծովակալ Բրեդ Քուփերը կիրակի և երկուշաբթի օրերին Իսրայելում հանդիպել է իսրայելական ուժերի գլխավոր շտաբի պետ, գեներալ-լեյտենանտ Էյալ Զամիրի հետ։
«Երկու առաջնորդները քննարկել են Իրանի կողմից իր սահմաններից դուրս իմաստալից կերպով ուժ ցուցադրելու կարողությունը վերացնելու ուղղությամբ իրականացվող գործողությունների ընթացքում գրանցված առաջընթացը։ Նրանք նաև վերահաստատել են ԱՄՆ-ի և Իսրայելի պաշտպանական գործընկերության ամրությունը և ընդգծել շարունակական համակարգման կարևորությունը։ Տարածաշրջանից մեկնելուց առաջ Քուփերը այցելել է ԱՄՆ զորքերին, որոնք տեղակայված են բազմաթիվ վայրերում՝ «Էպիկական ցասում» գործողությանն աջակցելու համար»,- ասվում է CENTCOM-ի հայտարարության մեջ։
Թարգմանությունը՝ Էմմա Չոբանյանի
