Ֆլորիդայի Փալմ Բիչ օդանավակայանը կվերանվանվի նախագահ Դոնալդ Թրամփի անունով

Ֆլորիդայի ամենամեծ՝ Փալմ Բիչի միջազգային օդանավակայանը, կկոչվի նախագահ Դոնալդ Թրամփի անունով։ Նահանգապետ Ռոն Դեսանտիսը գործադիր հրամանագիր է ստորագրել։ Թրամփն իր Մար-ա-Լագո նստավայր է թռչում այս օդանավակայանով, գրում է The Insider-ը։

Օդանավակայանի վերանվանումը հաստատվել էր նահանգի Ներկայացուցիչների պալատի և Սենատի կողմից։ Դրա լրիվ անվանումը կլինի «Նախագահ Դոնալդ Ջ. Թրամփի միջազգային օդանավակայան», իսկ PBI կոդը կփոխարինվի DJT-ով։ Որոշումը դեռևս սպասում է Դաշնային ավիացիոն վարչության (FAA) հաստատմանը, այն ուժի մեջ կմտնի հուլիսի 1-ից։

CBS News-ը, սակայն, հաղորդում է, որ երկուշաբթի ուշ երեկոյան հրապարակված հայտարարության մեջ FAA-ն նշել է, որ «չի հաստատում օդանավակայանների անվանափոխությունը»։

«Օդանավակայանների անվանափոխությունը տեղական նշանակության գործ է, և FAA-ն դրանք չի հաստատում: Այնուամենայնիվ, FAA-ն պետք է կատարի մի շարք վարչական առաջադրանքներ, այդ թվում՝ նավիգացիոն քարտեզների և տվյալների բազաների թարմացումը»,- ասվում է հայտարարությունում։

Որոշումը քննադատության է արժանացել տեղական դեմոկրատների կողմից։ Նահանգային Ներկայացուցիչների պալատի դեմոկրատների առաջնորդ Ֆենտրիս Դրիսկելը հանրապետականներին մեղադրել է «իրականությունից կտրված լինելու և ֆլորիդացիներին վերաբերող իրական խնդիրները չհասկանալու» մեջ:

Անցյալ ամիս, երբ նահանգի օրենսդիրները հաստատում էին օդանավակայանի անվանափոխությունը, The Trump Organization-ն ապրանքանիշի հայտեր էր ներկայացրել համապատասխան ապրանքների և ծառայությունների համար: Ընկերությունն այն ժամանակ ընդգծում էր, որ ո՛չ Թրամփը, ո՛չ էլ նրա ընտանիքի անդամները որևէ փոխհատուցում չեն ստանա օդանավակայանի անվանափոխության համար: Չնայած անվանափոխության օրինագիծը պահանջում է լիցենզավորման պայմանագիր Trump Organization-ի հետ, ընկերությունը հայտարարում է, որ պատրաստ է այս իրավունքը անվճար տրամադրել շրջանին:

Թարգմանությունը՝ Էմմա Չոբանյանի