Ադրբեջանի ԱԳՆ-ն «հայկական խմբավորումներին» մեղադրում է, իբր, «ադրբեջանցիների ցեղասպանության մեջ»

Ադրբեջանցիների, այսպես կոչված, «ցեղասպանության օրվա» կապակցությամբ հիմա էլ հայտարարություն է տարածել Ադրբեջանի ԱԳՆ-ն։ Դրանում հայերի հասցեին հերթական կեղծ մեղադրանքներն են հնչեցվել։

«Այսօր՝ մարտի 31-ին, ադրբեջանցիների ցեղասպանության օրն է։ Լրանում է մեր ժողովրդի դեմ արմատական ​​հայկական խմբավորումների կողմից իրականացված սարսափելի կոտորածների 108-ամյակը։ 1918 թվականի մարտին Բաքվի խորհրդի 6000 անդամների և Դաշնակցություն կուսակցության 4000 զինված անդամների կողմից իրականացված ցեղասպանությունը պատմության մեջ է մտել որպես էթնիկ զտումների ամենադաժան օրինակներից մեկը։ Այդ ժամանակահատվածում Կովկասի արտակարգ կոմիսար Ստեփան Շահումյանի խոստովանությունները նույնպես ապացուցում են, որ այս կոտորածները կատարվել են հենց էթնիկ ատելության հիման վրա՝ «հակահեղափոխության դեմ պայքարի» քողի տակ։ 20-րդ դարի սկզբին այս արյունալի ցեղասպանության քաղաքականությունը շարունակվեց հետագա ժամանակաշրջաններում և դարի վերջին ձեռք բերեց համակարգված բնույթ՝ ներկայիս Հայաստանի տարածքից ադրբեջանցիների զանգվածային տեղահանությունների, ադրբեջանական տարածքների օկուպացիայի տարիներին կատարված զանգվածային սպանությունների, մասնավորապես, Խոջալուի ցեղասպանության և այլ ռազմական հանցագործությունների տեսքով»,- ասվում է հայտարարությունում։

Նշվում է, թե հանցագործությունները, իբր, համակարգված կերպով իրականացվել են այնպիսի շրջաններում, ինչպիսիք են Բաքուն, Շամախին, Ղուբան, Ղարաբաղը, Զանգեզուրը, Նախիջևանը, Շիրվանը, ՀՀ մայրաքաղաք Երևանն էլ դրանում անվանվում է Իրևան։

Հավելենք, որ Բաքուն, որն ակտիվորեն իրականացնում է Հայոց ցեղասպանության ժխտման պետական քաղաքականություն, քարոզչական նարատիվներով արհեստականորեն փորձում է ստեղծել «ադրբեջանցիների ցեղասպանության» թեման ու շրջանառել միջազգային հարթակներում։

Թարգմանությունը՝ Էմմա Չոբանյանի