Բաքուն միջազգային հանրությունից «հայերի կողմից ադրբեջանցիների ցեղասպանության ճանաչում» է ակնկալում

Ադրբեջանի մարդու իրավունքների պաշտպան Սաբինա Ալիևան հայտարարություն է տարածել՝ նվիրված մարտի 31-ին ադրբեջանցիների, այսպես կոչված, ցեղասպանության օրվան։ Հայտարարության մեջ հերթական անհիմն մեղադրանքներ են հնչում Հայաստանի հասցեին։

«Պատմության տարբեր փուլերում ադրբեջանցիները ենթարկվել են էթնիկ զտումների և ցեղասպանության քաղաքականության, որը միտումնավոր իրականացվել է հայերի կողմից, զանգվածաբար ոչնչացրել են նրանց ազգային պատկանելության և կրոնի հիման վրա: 20-րդ դարի սկզբից ի վեր Ադրբեջանի տարբեր շրջաններում և ներկայիս Հայաստանի տարածքում բնակվող ադրբեջանական բնակչության նկատմամբ կատարվել են համակարգված և դաժան հանցագործություններ»,- ասվում է Սաբինա Ալիևայի հայտարարությունում։

Նշվում է, թե «միջազգային մակարդակով դեռևս արդար դիրքորոշում չի արտահայտվել ազգային և կրոնական պատկանելության հիման վրա քաղաքացիական բնակչության համակարգված ոչնչացման և 1918 թվականի մարտ-ապրիլին կատարված ցեղասպանության հանցագործությունների վերաբերյալ»։ Ըստ Ալիևայի՝ «ադրբեջանցիների դեմ կատարված ցեղասպանության հանցագործությունների միջազգային ճանաչումը, ինչպես նաև արդարադատության վերականգնումը կարևոր են ապագայում մարդկության դեմ նմանատիպ հանցագործությունների կրկնությունը կանխելու համար»։

«Միջազգային կազմակերպությունները և ՄԱԿ-ի անդամ պետությունները պետք է սկզբունքային դիրքորոշում ընդունեն հայերի կողմից ադրբեջանցիների դեմ իրականացված համակարգված էթնիկ զտումների և ցեղասպանության հանցագործությունների վերաբերյալ և 1918 թվականի իրադարձությունները ճանաչեն որպես ցեղասպանություն»,- ասվում է հայտարարության մեջ։

Հավելենք, որ այս հայտարարությունն ու Հայաստանի հանդեպ կեղծ մեղադրանքները հնչում են հայ-ադրբեջանական երկխոսությանն ու խաղաղության գործընթացին զուգահեռ։

Թարգմանությունը՝ Էմմա Չոբանյանի