Քաղաքականություն
31.03.2026 | 09:55
ՌԴ տրանսպորտի նախարար Անդրեյ Նիկիտինը հայտարարել է, որ Ռուսաստանը չի բանակցում Հայաստանի երկաթուղիների կոնցեսիոն կառավարումը Ղազախստանին փոխանցելու հարցը: Այս հարցի մասին նախկինում խոսել էր Հայաստանի վարչապետ Նիկոլ Փաշինյանը, գրում է Կոմերսանտը:
«Կարող եմ ասել, որ նախ՝ մենք որևէ մեկին որևէ կոնցեսիա տալու ծրագրեր չունենք։ Երկրորդ՝ մեր գործընկերներն ու ընկերները Հայաստանում պաշտոնապես չեն քննարկել այս հարցերը մեզ հետ»,- ասել է Անդրեյ Նիկիտինը ՌԻԱ Նովոստիին տված հարցազրույցում։
Նա ընդգծել է, որ այս հարցի շուրջ Ղազախստանի հետ նույնպես շփումներ չկան։
2008 թվականի փետրվարին Հայաստանը ստորագրել է կոնցեսիոն պայմանագիր, որով հանրապետության երկաթուղային տրանսպորտային համակարգը փոխանցվել է «Հարավկովկասյան երկաթուղիներ» ընկերության կառավարմանը, որը «Ռուսական երկաթուղիներ»-ի դուստր ձեռնարկությունն է։ Պայմանագիրը նախատեսում է 30-ամյա կոնցեսիոն պայմանագիր՝ տասը տարի երկարաձգման հնարավորությամբ։
2025 թվականի դեկտեմբերին Նիկոլ Փաշինյանը խնդրել է իր ռուս գործընկերներին արագ վերականգնել երկաթուղու այն հատվածները, որոնք տանում են դեպի Թուրքիայի և Ադրբեջանի հետ սահմաններ (այդ հատվածներն անհրաժեշտ են Հայաստանի և ԱՄՆ-ի միջև «Թրամփի երթուղի» տրանսպորտային նախագծի իրականացման համար)։
Մարտի սկզբին Հայաստանի վարչապետը հայտարարեց Ռուսաստանի հետ երկաթուղու կառավարումը մեկ այլ երկրի, օրինակ՝ Ղազախստանին, ԱՄԷ-ին կամ Կատարին փոխանցելու վերաբերյալ քննարկումների մասին։ Մարտի 26-ին Փաշինյանը հույս էր հայտնել, որ Ռուսաստանը և Հայաստանը կհամաձայնվեն կառավարումը փոխանցել ղազախ գործընկերներին, սակայն մինչ օրս ռուս գործընկերները չեն հաստատել այս տարբերակը։
«Դեմ չենք լինի, եթե պարզվի, որ մեր և ՌԴ-ի միջև կա փոխադարձ ըմբռնում, և ղազախական ընկերությունը երկուսիս համար էլ ընդունելի է… Բայց ՌԴ-ի գործընկերները դեռ չեն ասել՝ «Լավ, համաձայն ենք, եկեք տենց անենք»։ Քննարկումն այլ ռեժիմով է, բայց այդպիսի գաղափարներ կան քննարկվող։ Առաջնահերթություններ չկան, հարցը չի քննարկվում, թևածող կամ քայլող գաղափարներ կան»,- ասել էր Փաշինյանը։
Թարգմանությունը՝ Էմմա Չոբանյանի
