«Ժողովրդի ձեռքին դանակ անգամ չի եղել»․ Քոչարյանի պաշտպանների ներկայացրած տեսագրությունը «հավատ չի ներշնչում». ՏԵՍԱՆՅՈՒԹ

Ռոբերտ Քոչարյանի պաշտպանական թիմը երեկ Վճռաբեկ դատարանին է ներկայացրել տեսագրություն, որտեղ, իրենց պնդմամբ, հաստատվում է պաշտոնաթող նախագահի՝ դեռևս 2008 թվականին արված հայտարարությունը, թե ցուցարարները կրակում էին ոստիկանների ուղղությամբ։ Չնայած այս տասը տարիների ընթացքում պաշտոնաթող նախագահի խոսքերը փաստող տեսանյութն այդպես էլ չէր հրապարակվում, երեկ Քոչարյանի պաշտպաններից Հայկ Ալումյանը լրագրողներին ասաց՝ դատարանին է ներկայացրել այդ կադրերը. «Մեղադրանքի մեջ այնպիսի ձևակերպումներ կան, որ ցուցարարները եղել են բացառապես խաղաղ տրամադրված և բոլորովին անզեն։ Մենք ասում ենք, որ առկա են տասնյակ և տասնյակ դատավճիռներ, որոնցում գրված է, որ ցուցարարները եղել են զինված, կոնկրետ մարդկանց անուններ են նշված, կոնկրետ զենքի տեսակներ»:

Փաստաբան Հայկ Ալումյանից տեղեկացանք, որ խոսքը դեռևս երեկվա նիստից առաջ «Yerevan.today»-ում տեղադրված տեսագրության մասին է․ դրանում հստակ չի երևում, թե իրականում ով է կրակողը, չի երևում զինատեսակն ու անհասկանալի է, թե ում ուղղությամբ են այդ կրակոցները։ Մարտի 1-ի գործով փաստահավաք խմբի նախկին անդամ Անդրանիկ Քոչարյանը հարց է բարձրացնում. եթե այդ տեսագրությունը կար, ապա ինչո՞ւ մինչ օրս չէր հրապարակվում։ Նրա համար անհասկանալի է՝ այդ տեսագրության մեջ ցուցարարն ո՞ւմ ուղղությամբ և ինչի՞ համար էր կրակում. «Եթե կրակում էր զորքի վրա, ապա ինչո՞ւ զորքից որևէ մեկը չի վիրավորվել»:

Մարտի 1-ի գործով ԱԺ նախկին հատուկ հանձնաժողովի նախագահ Սամվել Նիկոյանն էլ Factor.am-ին ասաց՝ իրենք նման կադր, որտեղ ցուցարարը կրակում է ոստիկանների ուղղությամբ, երբևէ չեն ունեցել. «Հանձնաժողովը նման կադր չի ունեցել, և դրա համար այս պահին ոչինչ ասել չեմ կարող»:

Մարտի 1-ի զոհերից Գոռ Քլոյանի հայրը՝ Սարգիս Քլոյանը, չի հավատում տեսանյութի բովանդակությանն ու Ռոբերտ Քոչարյանի փաստաբանների պնդումներին։ Ասում է՝ նայել է տեսագրությունը, բայց կադրերն անհասկանալի են, և դա դեռ ապացույց չէ. «Ես մասնակից եմ եղել ցույցերին, ժողովրդի ձեռքին դանակ անգամ չի եղել: Նա ուզում է փրկել Քոչարյանին, չի կարող: Քոչարյանը պիտի հայտնվի ճաղերի հետևում, նա մարդասպան է, նա գնդակահարել է 10 անմեղ մարդկանց, նրա հրամանով են գնդակահարել»:

Սարգիս Քլոյանը վստահ է, որ ներկա իշխանություններին կհաջողվի, ինչպես հայտարարել են, բացահայտել Հայաստանի պատմության այդ արյունալի էջերի հեղինակներին:

Նշենք, որ սահմանադրական կարգը տապալելու մեջ մեղադրվող ՀՀ երկրորդ նախագահ Ռոբերտ Քոչարյանի խափանման միջոցի հարցը, Վճռաբեկ դատարանի որոշմամբ, կրկին կքննվի Վերաքննիչ դատարանում: Սակայն ի՞նչ ժամկետներում՝ պարզ չէ, օրենքն այս հարցում ժամկետներ չի սահմանում:

Մանրամասները՝ տեսանյութում

Լիլիթ Շաբոյան