20.04.2026 | 14:13
ՌԴ ԱԴԾ-ն հայտարարել է Գերմանիայի քաղաքացու ձերբակալման մասին՝ ահաբեկչություն նախապատրաստելու մեղադրանքով
Հայաստանը ամերիկյան սպառազինության հետ կապված առաջարկ չի ստացել. Զոհրաբ Մնացականյան
Քաղաքականություն
16.11.2018 | 17:49
Ամերիկյան սպառազինության հետ կապված Հայաստանը որևէ առաջարկ չի ստացել: ՏԱՍՍ-ին տված հարցազրույցում այս մասին նշել է ՀՀ ԱԳ նախարարի պաշտոնակատար Զոհրաբ Մնացականյանը՝ պատասխանելով Ջոն Բոլթոնի այցից հետո Նիկոլ Փաշինյանի հայտարարության մասին հարցին, թե շահեկան առաջարկի դեպքում հայկական կողմը կքննարկի նման հնարավորությունը:
Նա հավելել է, որ Հայաստանը գտնվում է միանգամայն զգայուն տարածաշրջանում, որտեղ չլուծված հակամարտություն կա, և խաղաղության ու կայունության հասնելը, ինչպես նաև դրան նպաստող մթնոլորտը, մեզ համար միանգամայն կարևոր են:
«Եվ երբ մենք դժգոհություն ենք հայտնում մեր գործընկերներին՝ Ադրբեջանին զենք վաճառելու առիթով, ընդգծում ենք, որ չենք կարող այդ փաստին որպես գործարք վերաբերվել, այլ որպես զենքի, որը խլում է մեր զինվորների, քաղաքացիական բնակչության կյանքը: Այնպես որ՝ մեր տարածաշրջանում սպառազինությունների մրցավազքը չափազանց վտանգավոր է»,- հայտարարել է Զոհրաբ Մնացականյանը:
Ինչ վերաբերում է հայ-ռուսական հարաբերությունների և դրանցում չիրացված ներուժի մասին հարցին, ապա նախարարի պաշտոնակատարն ասել է՝ հայ-ռուսական հարաբերությունների օրակարգը հագեցած է և դինամիկ:
«Գոյություն ունեն համագործակցության՝ արդեն կայացած ձևաչափեր, որոնք մեզ թույլ են տալիս մեր դաշնակցային փոխգործակցության խորացման նոր ուղղություններ սահմանել: Մենք սերտորեն համագործակցում ենք նաև ԵՏՄ-ի, ՀԱՊԿ-ի, ինչպես նաև այլ բազմակողմ հարթակներում»,- նշել է Մնացականյանը:
