Պուտինը սահմանափակել է կանխիկ ռուբլու և ոսկու դուրսբերումը ԵՏՄ երկրներ, այդ թվում՝ Հայաստան

ՌԴ նախագահ Վլադիմիր Պուտինը հրամանագիր է ստորագրել, որով սահմանափակումներ են մտցվում Եվրասիական տնտեսական միության երկրներ՝ Հայաստան, Բելառուս, Ղազախստան և Ղրղզստան կանխիկ ռուբլու և ոսկու դուրսբերման համար, գրում է Current time-ը:

Ապրիլի 1-ից ֆիզիկական անձանց արգելվում է արտահանել 100,000 դոլարին համարժեք գումարից ավելի կանխիկ ռուբլի։ Անհատ ձեռնարկատերերի և իրավաբանական անձանց համար արգելքը կգործի՝ անկախ գումարի չափից։

Բացառություններ կարվեն այն դեպքերի համար, երբ արտահանումն իրականացվում է միջազգային օդանավակայանների օդային անցակետերի միջոցով: Այդ դեպքերում պահանջվելու են արտահանողների հաշիվներից միջոցների դուրսբերումը հաստատող բանկային քաղվածքներ։

Մայիսի 1-ից նաև 100 գրամից ավելի քաշ ունեցող ոսկու ձուլակտորների դուրսբերման արգելք կսահմանվի: Այս սահմանափակումը վերաբերում է ֆիզիկական, իրավաբանական անձանց և անհատ ձեռնարկատերերին:

Բացառություն կկատարվի Մոսկվայի (Վնուկովո, Դոմոդեդովո և Շերեմետևո) և Վլադիվոստոկի (Կնևիչ) միջազգային օդանավակայանների օդային անցակետերով դուրսբերման համար: Արտահանման համար անհրաժեշտ կլինի Դաշնային փորձաքննության գրասենյակի թույլտվությունը: Այս փաստաթուղթն անհրաժեշտ կլինի նաև ֆիզիկական անձանց՝ Եվրասիական տնտեսական միության (ԵՏՄ) անդամ չհանդիսացող երկրներ ոսկի արտահանելու համար։

Հրամանագրում նշվում է, որ «ազգային անվտանգությունը և ազգային շահերը պաշտպանելու նպատակով» ներդրվում է արտարժույթի և ոսկու ձուլակտորների դուրբերման հատուկ ընթացակարգ։

Bloomberg-ի հաղորդմամբ՝ 2022 թվականի փետրվարից ի վեր Ռուսաստանի Կենտրոնական բանկի (ԿԲ) ոսկու պաշարների արժեքն աճել է ավելի քան 216 միլիարդ դոլարով, իսկ երկրի միջազգային ընդհանուր պաշարներն անցյալ տարվա վերջին հասել են 755 միլիարդ դոլարի։ Ռուսաստանն աշխարհում այս մետաղի երկրորդ խոշորագույն արտադրողն է՝ տարեկան ավելի քան 300 տոննա։

Թարգմանությունը՝ Էմմա Չոբանյանի