25.03.2026 | 21:16
Հայաստանի տնտեսության ակտիվության ցուցանիշն աճել է 7,4%-ով. արտահանման և ներմուծման ծավալներն ավելացել են
Դատախազությունը բողոքարկել է Դավիթ Սանասարյանի արդարացման դատավճիռը
Հասարակություն
25.03.2026 | 10:23
Գլխավոր դատախազությունը բողոքարկել է Պետական վերահսկողական ծառայության նախկին պետ Դավիթ Սանասարյանի գործով արդարացման դատավճիռը: Այս մասին Factor TV-ին հայտնեցին Դատախազությունից:
Հիշեցնենք, որ Երևանի քրեական դատարանի դատավոր Դավիթ Բալայանն արդարացրել է պաշտոնեական լիազորությունները չարաշահելու հոդվածով մեղադրվող Դավիթ Սանասարյանին:
Ըստ մեղադրանքի՝ Սանասարյանը, հանդիսանալով Պետական վերահսկողական ծառայության ղեկավար, ունենալով ծառայության անմիջական ղեկավարումն իրականացնելու, ծառայության աշխատակիցներին նշանակելու և ազատելու, կարգապահական տույժի ենթարկելու, վերահսկվող օբյեկտներում ուսումնասիրություններ իրականացնելու հանձնարարագրեր տալու, վերահսկվող օբյեկտներից ծառայության գործառույթներին առնչվող տեղեկություններ և փաստաթղթեր պահանջելու լիազորություններ, խմբային շահերից ելնելով, իր պաշտոնեական դիրքն օգտագործել է ծառայության շահերին հակառակ, ինչպես նաև չի կատարել իր ծառայողական պարտականությունները: Սանասարյանը բազմիցս հայտարարել է, որ չի ընդունում մեղադրանքը, և որ իր նկատմամբ հաշվեհարդար է իրականացվում։
Դատարանում քննվող գործով մեղադրյալ են եղել նաև ՊՎԾ գնումների գործընթացների վերահսկողության վարչության պետի ժամանակավոր պաշտոնակատար Սամվել Ադյանը, նույն վարչության գլխավոր մասնագետ Գևորգ Խաչատրյանը և «Զորաշեն» ՍՊԸ-ի փաստացի կառավարումն իրականանցող Տարոն Ավետիսյանը, սակայն նրանց նկատմամբ քրեական հետապնդումը դատաքննության ընթացքում դադարեցվել է՝ քրեական պատասխանատվության ենթարկելու վաղեմության ժամկետն անցած լինելու, այսինքն՝ ոչ արդարացնող հիմքով:
Արաքս Մամուլյան
