Որոշ ուժեր նոր սեպտեմբերյան պատերազմ են պատրաստում՝ ծանր հետևանքներով․ Փաշինյան․ ՏԵՍԱՆՅՈՒԹ

«Հիբրիդային պատերազմն այն է, երբ որ գրվում և վճարովի գործիքներով, ներառյալ արհեստական բանականության կիրառմամբ, որ ես Դուբայում տուն ունեմ, Ֆրանսիայում տուն ունեմ, չգիտեմ, Լոս Անջելեսում տուն ունեմ, որ իմ ընտանիքի անդամները տարբեր երկրներում բնակարաններ ունեն, բիզնեսներ ունեն, Հայաստանում բիզնեսներ ունեն, բնակարաններ ունեն, միլիոններ ունեն շվեյցարական բանկերում, որ մենք օրգաններ ենք վաճառում, որ մենք անչափահասների, չգիտեմ, տարբեր սեռական շահագործման գործիքներ ենք կիրառում, այդ ամեն ինչը հիբրիդային պատերազմ է»,- այս մասին լրագրողների հետ ճեպազրույցի ժամանակ նշեց վարչապետ Նիկոլ Փաշինյանը։

«Ակնկալում ենք, որ այս ընտրությունների արդյունքում ունենանք սահմանադրական մեծամասնություն, որովհետև սահմանադրական մեծամասնությունն է, որ կերաշխավորի, որ պրոցեսները, մասնավորապես, տարածաշրջանային խաղաղության համատեքստում, մենք դարձնենք լիարժեքորեն անշրջելի։ Ինչ վերաբերում է «պատերազմի կուսակցությանը», դա հիմա ամեն օրվա հետ ինձ համար դառնում է ավելի ակնհայտ, որովհետև այդ կուսակցությունները և այդ շրջանակները, ըստ էության, ինչ են ասում։

Առաջինն ասում են, որ իրենք դեմ չեն խաղաղությանը, և երկրորդիվ սկսում են խոսել, որ իրենց իշխանության գալու պարագայում սկսելու են վերանայել խաղաղությունը։ Դա ես շատ ուղիղ, առանց սեթևեթանքի ուզում եմ ասել, որ պատերազմ է Հայաստանի Հանրապետության ոչ միայն տարածքային, այլև ինքնիշխանության կորստով։

Այդ բոլոր ուժերը, ըստ էության, հանդես են գալիս խաղաղության ռևիզիայի դիրքերից, ինչը նշանակում է անխուսափելի պատերազմ, անխուսափելի։ Ընդ որում՝ ընտրություններից շատ չանցած, մաքսիմալ աշնանը։ Ես վերլուծում եմ, չէ՞, այդ տեքստերը ինչ են ասում։ Այդ բոլոր ուժերը, եթե անհրաժեշտ է անուններն էլ կտամ, հստակ մի մասը, ենթադրում եմ, չի էլ հասկանում ինչ է ասում, բայց իրենք պատրաստում են նոր սեպտեմբերյան պատերազմ ծանր հետևանքներով»,- նշեց Փաշինյանը։

Մանրամասները՝ տեսանյութում։