09.06.2026 | 23:19
Կանանց Հայաստանի հավաքականը 0:6 հաշվով պարտվեց Բելառուսին. ՏԵՍԱՆՅՈՒԹ
Իրանում արկը հարվածել է Ռուսաստանի կողմից կառուցվող Բուշերի ատոմակայանին
Քաղաքականություն
18.03.2026 | 11:30
Ատոմային էներգիայի միջազգային գործակալությունը (ՄԱԳԱՏԷ) X-ում հայտնել է, որ Իրանից տեղեկատվություն է ստացել երկրի հարավ-արևմուտքում գտնվող Բուշերի ատոմակայանի կառույցներին թռչող օբյեկտի հարվածի մասին: Հայտարարության մեջ չի նշվում արկի տեսակը, գրում է BBC-ի ռուսական ծառայությունը։
Երեքշաբթի երեկոյան Իրանի Ատոմային Էներգիայի կազմակերպությունը հայտնել է արկի հարվածի մասին, որին հաջորդել է օբյեկտը կառուցող ռուսական պետական կորպորացիայի՝ «Ռոսատոմ»-ի հաղորդագրությունը։ Չի նշվում, թե կոնկրետ ինչ է հարվածել ատոմակայանին։
«Ռոսատոմ»-ը մի շարք այլ մանրամասներ է հայտնել. «Մոսկվայի ժամանակով 18:11-ին հարված է հասցվել Բուշերի ատոմակայանի տարածքում գտնվող չափագիտության ծառայության շենքի հարակից տարածքին՝ գործող էներգաբլոկի մոտակայքում»։
Զոհերի կամ ճառագայթային արտահոսքի մասին հաղորդագրություններ չկան։ ՄԱԳԱՏԷ-ն հաստատել է սա։
Կազմակերպության գլխավոր տնօրեն Ռաֆայել Գրոսսին կրկին կոչ է արել հակամարտության կողմերին ցուցաբերել առավելագույն զսպվածություն՝ միջուկային վթարը կանխելու համար։
Բուշերի ատոմակայանում աշխատում է մեկ ռեակտոր, որը կառուցվել է Ռուսաստանի կողմից և գործարկվել 2013 թվականին: Պատերազմից առաջ «Ռոսատոմ»-ն այնտեղ կառուցում էր ևս երկու էներգաբլոկ: Մարտի 3-ին ռուսական կորպորացիայի ղեկավար Ալեքսեյ Լիխաչովը հայտարարեց, որ մարտական գործողությունների պատճառով շինարարական աշխատանքները դադարեցվել են, և ընկերությունը կփորձի տարհանել մի քանի հարյուր ռուս աշխատակիցներին: Այնուամենայնիվ, նրանց մեծ մասը մնում է տեղում. երեքշաբթի Լիխաչովը ռուսական լրատվականներին ասել է, որ տարհանման է սպասում 480 մարդ:
Թարգմանությունը՝ Էմմա Չոբանյանի
