Իսրայելը հերքել է հրթիռների խոցման համակարգերի պակասի մասին տեղեկությունները

Իսրայելի արտաքին գործերի նախարար Գիդեոն Սաարը հերքել է ԶԼՄ-ների հաղորդումները, թե Իրանի հետ պատերազմի պայմաններում Իսրայելում ավարտվում են բալիստիկ հրթիռների խոցման համար նախատեսված հակահրթիռները։ Բացի այդ, նա հերքել է նաև տեղեկությունը, թե առաջիկա օրերին նախատեսվում են ուղղակի բանակցություններ Լիբանանի հետ։

«Երկու հարցերի պատասխանն էլ՝ ոչ»,- հայտարարել է Սաարը լրագրողներին կիրակի՝ մարտի 15-ին, Իսրայելի հյուսիսում գտնվող բեդուինական Զարզիր գյուղ կատարած համերաշխության այցի ժամանակ։

Նախօրեին ամերիկյան Semafor լրատվական պորտալը, հղում անելով ԱՄՆ պաշտոնյաներին, հայտնել էր, որ Իսրայելի իշխանությունները Վաշինգտոնին տեղեկացրել են բալիստիկ հրթիռների խոցման համակարգերի «կրիտիկական» պակասի մասին։

Իր հերթին իսրայելական Haaretz թերթը մարտի 14-ին գրել էր, որ Իսրայելն ու Լիբանանը մոտ օրերս, հավանաբար, կանցկացնեն ուղղակի բանակցություններ։ Հերքելով այս տեղեկությունը՝ Սաարը նշել է.

«Եթե լիբանանյան կառավարությունն ու լիբանանյան բանակը ցանկանում են ինչ-որ բան փոխել, ապա պետք է քայլեր ձեռնարկեն Լիբանանի տարածքից Հեզբոլլահ շարժման հարձակումները դադարեցնելու համար»։

Իսրայելի արտաքին քաղաքական գերատեսչության ղեկավարը այցելել է Զարզիր բեդուինական գյուղ, որը մարտի 13-ին ենթարկվել էր իրանական հրթիռային հարձակման։ Այդ հարձակման հետևանքով վիրավորվել է 58 մարդ։

ԱՄՆ-ն և Իսրայելը փետրվարի 28-ից ավիահարվածներ են հասցնում Իրանին։ Դրանց հետևանքով սպանվել են Իսլամական Հանրապետության գերագույն առաջնորդ Ալի Խամենեին և Իրանի ղեկավարության այլ ներկայացուցիչներ։

Իրանը պատասխան հարվածներ է հասցնում Իսրայելին, Պարսից ծոցի մի շարք երկրների և տարածաշրջանում գտնվող ամերիկյան ռազմական օբյեկտներին։

Այն բանից հետո, երբ լիբանանյան արմատական շիա շարժումը՝ Հեզբոլլահը, մարտի 2-ին միացավ պատերազմին Իրանի կողմում՝ հրթիռներով և անօդաչու սարքերով հարվածելով Իսրայելին, իսրայելական բանակը նույնպես հարվածներ հասցրեց Լիբանանի հարավին և Բեյրութի հարավային արվարձաններին, որտեղ գտնվում է շարժման ենթակառուցվածքը։

Մարտի 15-ին Իրանի աջակցությունը վայելող այդ խմբավորումը հայտարարեց Լիբանանի հարավում Իսրայելի բանակի հետ «ուղղակի» մարտական բախումների մասին։