Քաղաքականություն
14.03.2026 | 16:36
Իսրայելի պաշտպանության նախարար Իսրայել Կացը հայտարարել է, որ Իրանի դեմ պատերազմը մտնում է վճռորոշ փուլ։ Այս հայտարարությունը հնչել է, երբ ԱՄՆ զինված ուժերը հարվածներ են հասցրել Իրանի Խարկ կղզուն։
«Իրանի դեմ գլոբալ և տարածաշրջանային պայքարը, որը գլխավորում են ԱՄՆ նախագահ Դոնալդ Թրամփը և Իսրայելի վարչապետ Բենիամին Նեթանյահուն, սրվում է և մտնում վճռորոշ փուլ, որը կշարունակվի այնքան ժամանակ, որքան անհրաժեշտ կլինի»,- Կացի հեռուստաուղերձից մեջբերում է AFP գործակալությունը։
Շաբաթ գիշերը ԱՄՆ նախագահ Դոնալդ Թրամփը հայտարարել էր, որ ամերիկյան զինված ուժերը ոչնչացրել են ռազմական թիրախներ Իրանի Խարկ կղզում, որտեղ գտնվում է նավթային տերմինալը, որը ապահովում է երկրի նավթի արտահանման մոտ 90 տոկոսը։
Թրամփը հավելել էր, որ ԱՄՆ-ը «որոշել է չջնջել երկրի երեսից» կղզու նավթային օբյեկտները, սակայն դա կարող է փոխվել, եթե Իրանը շարունակի արգելափակել Հորմուզի նեղուցը։
Իրանի պաշտոնյաները շաբաթ օրը հայտարարել են, որ Խարկ կղզում նավթային գործունեությունը շարունակվում է սովորական ռեժիմով՝ չնայած հասցված հարվածներին։
