Մերձավոր Արևելքի պատերազմի պատճառով Իրանում երեք միլիոն ներքին տեղահանված կա. ՄԱԿ

ՄԱԿ-ի փախստականների հարցերով գործակալությունը (ՓՀԳ)  հայտարարել է, որ Մերձավոր Արևելքում պատերազմի սկսվելուց ի վեր Իրանի ներսում տեղահանվել է մինչև 3,2 միլիոն մարդ։

«Նախնական գնահատականների համաձայն՝ 600,000-ից մինչև մեկ միլիոն իրանական տնային տնտեսություն ժամանակավորապես տեղահանված է Իրանի ներսում՝ շարունակվող հակամարտության հետևանքով»,- ասել է Այակի Իտոն, որը ղեկավարում է ՄԱԿ-ի փախստականների հարցերով գերագույն հանձնակատարի գրասենյակի արտակարգ իրավիճակների աջակցության թիմը և Մերձավոր Արևելքի արտակարգ իրավիճակների համար փախստականների արձագանքման համակարգողն է։

Դա կազմում է «մինչև 3,2 միլիոն մարդ», ասել է նա հայտարարության մեջ՝ զգուշացնելով, որ «այս թիվը, հավանաբար, կշարունակի աճել, քանի որ ռազմական գործողությունները շարունակվում են, ինչը վկայում է մարդասիրական կարիքների մտահոգիչ սրման մասին»։

Իտոն նշել է, որ տեղահանվածների մեծ մասը, ըստ տեղեկությունների, «Թեհրանից և այլ խոշոր քաղաքային տարածքներից փախել է դեպի երկրի հյուսիս և գյուղական վայրեր՝ անվտանգություն փնտրելու համար»: Ըստ նրա՝ երկրում հյուրընկալված փախստական ​​ընտանիքները, որոնց մեծ մասն աֆղաններ են, նույնպես տուժել են, զգուշացնելով, որ նրանք «հատկապես խոցելի են՝ հաշվի առնելով նրանց արդեն իսկ անկայուն վիճակը և սահմանափակ աջակցության ցանցերը»։

Գործակալությունը, որը երկար ժամանակ ներկայություն ունի Իրանում, հայտարարել է, որ «հարմարեցնում է իր արձագանքն աճող կարիքներին՝ համագործակցելով ազգային իշխանությունների և գործընկերների հետ՝ բնակչության տեղաշարժերի աճին զուգընթաց ի հայտ եկող պահանջները գնահատելու և պատրաստվածությունը ուժեղացնելու համար»։

«ՄԱԿ-ի փախստականների հարցերով գերագույն հանձնակատարի գրասենյակը ընդգծում է քաղաքացիական բնակչությանը պաշտպանելու, մարդասիրական օգնության հասանելիությունը պահպանելու և սահմանները բաց պահելու անհրաժեշտությունը՝ համաձայն միջազգային պարտավորությունների»,- ասել է Իտոն։

Թարգմանությունը՝ Էմմա Չոբանյանի