Գերմանիան և այլ երկրներ կազատեն իրենց նավթի պահուստարանների մի մասը, քանի որ պատերազմը սահմանափակում է մատակարարումները․ նախարար

Գերմանիան պատրաստվում է ազատել իր ազգային նավթային պաշարների մի մասը, քանի որ Իրանի դեմ պատերազմի պատճառով էներգակիրների գները կտրուկ աճում են, Բեռլինում հայտարարել է Գերմանիայի էներգետիկայի նախարար Կատերինա Ռայխեն, գրում է DW-ն։

Բեռլինը միանում է G7-ի մյուս երկրներին և ազատում է պահուստարանները՝ որպես էներգակիրների գների կայունացման միջազգային համակարգված ջանքերի մաս։ Այս քայլն արվում է այն բանից հետո, երբ Միջազգային էներգետիկ ասոցիացիան (ՄԷԱ) երեքշաբթի հատուկ նիստ է անցկացրել անդամ պետությունների կողմից ազգային պաշարների ազատման հնարավորության վերաբերյալ։

Ճապոնիան չորեքշաբթի հայտարարել է, որ նավթի պաշարները կազատի արդեն հ հաջորդ երկուշաբթի՝ հավելելով, որ չի սպասի այլ երկրների։

«Միջազգային պահուստների համակարգված ազատման վերաբերյալ պաշտոնական որոշմանը չսպասելով՝ Ճապոնիան որոշել է առաջատար դեր ստանձնել միջազգային էներգետիկ շուկայում առաջարկի և պահանջարկի մեղմացման գործում՝ արդեն այս մարտի 16-ին ռազմավարական պաշարներ ազատելով»,- լրագրողներին ասել է վարչապետ Սանաե Տակաիչին։

Ֆրանսիայի ֆինանսների նախարար Ռոլան Լեսկյուրն էլ հայտարարել է, որ երկրների նավթի պահուստների ազատման ծրագրերը «անկասկած բարձր համակարգված ռազմավարության մաս են կազմում»։

Արտակարգ միջոցառումների պատճառը Իրանի կողմից Պարսից ծոցում նավագնացության դեմ արշավն է։ ԱՄՆ-ի և Իսրայելի հարվածներին ի պատասխան՝ Թեհրանը թիրախավորում է առևտրային նավերը՝ փաստացի կաթվածահար անելով երթևեկությունը Հորմուզի նեղուցով։

G7-ը ևս աջակցություն է հայտնել շուկայի կայունացման միջոցառումներին. երեքշաբթի G7-ի անդամ պետությունների էներգետիկայի նախարարները խոստացել են իրենց հիմնարար աջակցությունը «կանխարգելիչ միջոցառումներին», այդ թվում՝ ռազմավարական պաշարների ներգրավմանը։

Ավելի վաղ հաղորդվել էր, որ Իրանը նույնիսկ պատերազմից առաջ արագորեն նավթ էր արտահանում Խարկ կղզուց, որը Պարսից ծոցի կարևոր նավթային տերմինալ է։ Kpler վերլուծական ընկերության տվյալներով՝ միայն փետրվարի 15-ից 20-ը կղզուց արտահանումը կազմել է մոտ 20,1 միլիոն բարել։ Թեհրանը, ըստ երևույթին, ձգտում էր մեծացնել իր արտադրությունը սպասվող սահմանափակումներից առաջ, ասվում է հրապարակման մեջ։

Թարգմանությունը՝ Էմմա Չոբանյանի