20.05.2026 | 23:00
Իսրայելը քննարկում է Ստամբուլում հյուպատոսության փակման հարցը՝ Թուրքիայի հետ լարված հարաբերությունների ֆոնին
Իրանի ոստիկանապետը հայտարարել է, որ հակակառավարական ցուցարարներին կվերաբերվեն որպես «թշնամիների»
Քաղաքականություն
11.03.2026 | 15:37
Իրանի ցուցարարներին կվերաբերվեն որպես թշնամիների, եթե նրանք աջակցեն Թեհրանի թշնամիներին, զգուշացրել է երկրի ոստիկանապետ Ահմադ-Ռեզա Ռադանը երեքշաբթի երեկոյան IRIB պետական հեռուստաալիքի եթերում՝ մտավախությունների ֆոնին, որ պատերազմի ֆոնին զանգվածային հակակառավարական ցույցերը կարող են վերսկսվել։
«Եթե որևէ մեկը հանդես գա թշնամու ցանկություններին համապատասխան, մենք այլևս նրան չենք համարի պարզապես ցուցարար, մենք նրան կդիտարկենք որպես թշնամի։ Եվ մենք նրանց հետ կանենք այն, ինչ անում ենք թշնամու հետ։ Մենք նրանց հետ կվարվենք այնպես, ինչպես թշնամիների հետ։ Մեր բոլոր ուժերը նույնպես պատրաստ են՝ ձեռքերը ձգանի վրա, պատրաստ պաշտպանել իրենց հեղափոխությունը»,- ասել է ազգային ոստիկանության պետը։
Այս զգուշացումը հնչում են այն բանից հետո, երբ իշխանությունները ճնշեցին կառավարության դեմ բողոքի ցույցերը հունվարին, որոնք բռնկվել էին մեկ ամիս առաջ պատժամիջոցների տակ գտնվող երկրում տնտեսական դժգոհությունների պատճառով։ Իշխանությունները բողոքի ցույցերը համարում էին «անկարգություններ», և Ռադանը մի պահ վերջնագիր էր ներկայացրել ցուցարարներին՝ հանձնվել կամ ենթարկվել օրենքի ողջ խստությանը։
Իրանի իշխանություններն ընդունում են անկարգությունների ժամանակ ավելի քան 3000 մարդու մահը, այդ թվում՝ անվտանգության ուժերի անդամների և պատահական անցորդների, սակայն պնդում են, որ բռնությունը պայմանավորված է եղել Իրանի թշնամիների կողմից հրահրված «ահաբեկչական գործողություններով»։
ԱՄՆ-ում գործող Human Rights Activists News Agency-ն (HRANA), սակայն, գրանցել է ավելի քան 7000 սպանություն, չնայած զոհերի թիվը, ըստ կազմակերպության, կարող է շատ ավելի բարձր լինել։ Ըստ տեղեկությունների՝ ձերբակալվել է ավելի քան 50,000 մարդ։
ԱՄՆ նախագահ Դոնալդ Թրամփը սկզբում ողջունել էր ցուցարարներին՝ Թեհրանին սպառնալով միջամտել նրանց անունից, երբ իշխանությունները սկսել էին մահացու բռնաճնշումները, բայց նրա սպառնալիքները շուտով անցան Իրանի միջուկային ծրագրին։
Վաշինգտոնն Իսրայելի հետ միասին փետրվարի 28-ից հարվածներ է հասցնում Իրանին, ինչը հանգեցրել է Թեհրանի կողմից Իսրայելի և Պարսից ծոցի տարածաշրջանում ԱՄՆ ռազմաբազաների դեմ պատասխան հարվածների։
Թարգմանությունը՝ Էմմա Չոբանյանի
