Բաքուն հայտարարում է, թե Ադրբեջանի կողմից Իրանի հետ սահմանին ծանր զինտեխնիկայի տեղակայման մասին լուրերը մանիպուլյացիա են

Սոցիալական ցանցերում շրջանառվող հրապարակումները, որտեղ պնդում կա, որ Ադրբեջանի և Իրանի միջև պետական ​​սահմանին, իբր, տեղակայված է ադրբեջանական բանակի ծանր սպառազինություն, դիտավորյալ աղավաղված և մանիպուլյացված տեղեկատվություն է։ Այս մասին ասվում է Ադրբեջանի Մեդիա զարգացման գործակալության (MEDIA) հայտարարության մեջ։

Նշվում է, թե տեսանյութը, որը պատկերված է ռազմական տեխնիկայի տեղաբաշխումը այս տարվա հունվարին, ներկայացվել է որպես նոր «փաստ», որը նպատակ ունի մոլորեցնել հանրությանը։

«Մենք խստորեն դատապարտում ենք նման տեղեկատվական սադրանքները, որոնք ուղղված են Մերձավոր Արևելքում ընթացող ռազմական գործողությունների ֆոնին տեղեկատվության մանիպուլյացիայի միջոցով խուճապ առաջացնելուն։ Հիշեցնում ենք, որ Ադրբեջանի զինված ուժերի անձնակազմի, զենքի, զինամթերքի կամ ռազմական տեխնիկայի տեղաշարժի կամ վերաբաշխման մասին տեղեկատվության տարածումը ենթադրում է քրեական պատասխանատվություն։ Տարածաշրջանում լարվածության ֆոնին սոցիալական ցանցերում ոչ ճիշտ և չստուգված տեղեկատվության տարածումը մեծացնում է ապատեղեկատվության ռիսկը և նպատակ ունի շփոթություն ստեղծել հասարակության մեջ»,- ասվում է հայտարարության մեջ։

Գործակալությունը նշել է, որ «լրատվամիջոցները պետք է բարձր պրոֆեսիոնալիզմ ցուցաբերեն սոցիալական ցանցերում տեղեկատվության հոսքի հարցում, հղում անեն միայն պաշտոնական աղբյուրներին և զերծ մնան կասկածելի կամ մանիպուլյատիվ նյութեր տարածելուց»։

Հավելենք, որ Նախիջևանում ԱԹՍ-ների հարձակման ֆոնին՝ նախօրեին համացանցում զինտեխնիկայի տեղաշարժի կադրեր էին տարածվում։

Թարգմանությունը՝ Էմմա Չոբանյանի