25.04.2026 | 11:33
Հռոմում կայացել է Հայոց ցեղասպանության 111-րդ տարելիցին նվիրված միջոցառում
Իսրայելը հարվածներ է հասցնում Լիբանանին. գիշերային հարձակման հետևանքով առնվազն 10 մարդ է զոհվել
Քաղաքականություն
04.03.2026 | 14:06
Իսրայելի կողմից գիշերը Լիբանանին հասցված հարվածների հետևանքով զոհվել է առնվազն 10 մարդ։ Լիբանանի պետական լրատվամիջոցները հայտնել են, որ Բաալբեք քաղաքի արևելյան մասում գտնվող բնակելի շենքի վրա հարվածի հետևանքով զոհվել է 4 մարդ, վիրավորվել՝ 8-ը, գրում է DW-ն։
Բեյրութի հարավում գտնվող Արամունում և Սաադիյաթում էլ իսրայելական հարձակման հետևանքով զոհվել է 6 մարդ, վիրավորվել՝ 8-ը։ Ըստ առողջապահության նախարարության՝ սա «նախնական թիվն» է։
Նշվում է, որ այս քաղաքները գտնվում են Իրանի կողմից աջակցվող «Հըզբոլլահ» շարժման խմբավորման ավանդական ամրոցներից դուրս։
Իսրայելը նաև հարվածել է Լիբանանի մայրաքաղաք Բեյրութի հյուրանոցին։
Վերջին հարվածները տեղի են ունեցել այն բանից հետո, երբ Առողջապահության համաշխարհային կազմակերպության ղեկավար Թեդրոս Գեբրեյեսուսը դատապարտել է Իսրայելի նախորդ հարվածների ժամանակ շտապօգնության ծառայության երեք աշխատակիցների սպանությունը։ Նա նշել է, որ ևս 6 մարդ վիրավորվել է պայթյուններից տուժածներին օգնություն ցուցաբերելիս։
Մարտի 4-ի առավոտյան Իսրայելի պաշտպանության ուժերը հայտարարել են Բեյրութում «Հըզբոլլահ»-ի ենթակառուցվածքների դեմ նոր հարվածների մեկնարկի մասին։ Ըստ The Times of Israel-ի՝ հարվածից առաջ իսրայելցի զինվորականները Լիբանանի մայրաքաղաքում գտնվող երկու շենքերի համար տարհանման նախազգուշացում են տվել։
Իսրայելի զինված ուժերն ավելի վաղ հայտարարել էին «Հըզբոլլահ»-ի դեմ «լայնածավալ հարվածների» մասին՝ այն բանից հետո, երբ զինյալ խմբավորումը երկուշաբթի հրթիռային հարվածներ էր հասցրել Իսրայելին։ Երեքշաբթի նաև հայտարարվել էր, որ ցամաքային զորքերը գրավել են հարավային Լիբանանի տարածքները, որոնք մոտ են Իսրայելի հետ սահմանին։
Թարգմանությունը՝ Էմմա Չոբանյանի
