25.04.2026 | 11:33
Հռոմում կայացել է Հայոց ցեղասպանության 111-րդ տարելիցին նվիրված միջոցառում
Իրանի բանակցողներն ԱՄՆ-ին հայտնել են, որ բավարար հարստացված ուրան ունեն՝ 11 միջուկային ռումբ ստեղծելու համար. Ուիթկոֆ
Քաղաքականություն
03.03.2026 | 14:28
2026 թվականի սկզբին Թեհրանի և Վաշինգտոնի միջև բանակցությունների առաջին փուլի ժամանակ իրանցի պաշտոնյաները պնդում էին, որ բավարար հարստացված ուրան ունեն՝ 11 միջուկային ռումբ ստեղծելու համար, Fox News-ին ասել է ԱՄՆ նախագահի հատուկ բանագնաց Սթիվ Ուիթկոֆը, գրում է Meduza-ն։
«Այդ առաջին հանդիպման ժամանակ իրանցի բանակցողները մեզ ուղիղ ասացին՝ առանց ամաչելու, որ իրենք ունեն 460 կիլոգրամ ուրան, որը հարստացված է մինչև 60%, և որ գիտեն, որ դա բավարար է 11 միջուկային ռումբ ստեղծելու համար»,- ասել է Ուիթկոֆը:
Նրա պնդմամբ՝ իրանցի բանակցողները հպարտ էին այն փաստով, որ իրենց հաջողվել է շրջանցել բոլոր տեսակի ստուգման արձանագրությունները՝ իրենց 11 միջուկային ռումբ ստեղծելու դիրքում դնելու համար: Թրամփի բանագնացը նաև պնդում է, որ հանդիպման ժամանակ Թեհրանի ներկայացուցիչները պնդել են ուրանը հարստացնելու իրենց «անօտարելի իրավունքը»։
«Մենք պատասխանել ենք, որ նախագահը կարծում է, որ մենք ունենք իրենց կանգնեցնելու անօտարելի իրավունք»,- հավելել է նա։
Ուիթկոֆը նշել է նաև, որ ԱՄՆ-ը փորձում էր «արդար գործարքի» հասնել Իրանի հետ։
«Մենք գնացինք այնտեղ և փորձեցինք արդար գործարքի հասնել նրանց հետ, և ակնհայտ դարձավ, հավանաբար, երկրորդ հանդիպման ավարտին, որ դա անհնար է։ Բայց մենք վերադարձանք երրորդ հանդիպմանը՝ նրանց վերջին հնարավորությունը տալու համար»,- եզրափակել է նա։
Վաշինգտոնի և Թեհրանի միջև բանակցությունների վերջին՝ երրորդ փուլը տեղի է ունեցել Ժնևում փետրվարի 26-ին։
Թարգմանությունը՝ Էմմա Չոբանյանի
