Իրանի դեմ իրականացվող «Էպիկական կատաղություն» գործողության շրջանակներում զոհվել է ԱՄՆ երեք զինծառայող

Արևելյան ժամանակով առավոտյան ժամը 9:30-ի դրությամբ Իրանի դեմ իրականացվող «Էպիկական կատաղություն» գործողության շրջանակներում զոհվել է ԱՄՆ երեք զինծառայող, ևս հինգը ծանր վիրավորվել են։ Այս մասին հայտնել է ԱՄՆ զինված ուժերի Կենտրոնական հրամանատարությունը (CENTCOM)։

«Մի քանի այլ զինծառայողներ ստացել են թեթև բեկորային վնասվածքներ, ուղեղի ցնցում և վերադառնում են իրենց ծառայությանը։ Խոշոր մարտական գործողությունները շարունակվում են։ Իրավիճակը փոփոխական է, ուստի, հարգելով ընտանիքների անդամներին, մենք լրացուցիչ տեղեկություններ, ներառյալ մեր զոհված մարտիկների ինքնությունը, կհրապարակենք միայն հարազատներին տեղեկացնելուց 24 ժամ անց»,-հայտնում են հրամանատարությունից։

ԱՄՆ-ը «Էպիկական կատաղություն» գործողությունը սկսել է 28 փետրվարին՝ նախագահ Դոնալդ Թրամփի հրահանգով, համատեղ՝ Իսրայելի «Առյուծի մռնչյուն» գործողության հետ։ Հարվածներ հասցվել են Իսլամական հեղափոխության պահապանների կորպուսի (ԻՀՊԿ) ռազմական օբյեկտներին, հրամանատարական կետերին և Իրանի հրթիռային ծրագրի օբյեկտներին։

Գործողությունը տեղի է ունեցել Իրանի միջուկային ծրագրի շուրջ բանակցությունների ձախողման ֆոնին։ Փետրվարի 26-ին Ժնևում Իրանը մերժել է ԱՄՆ պահանջները՝ ոչնչացնել միջուկային օբյեկտները Ֆորդոում, Նաթանզում, Սպահանում և հանձնել հարուստ ուրանի պահուստը։

Իրանի Կարմիր մահիկի տվյալներով՝ պատերազմի առաջին օրը զոհվել է առնվազն 201 մարդ, ևս 747-ը ստացել են վիրավորումներ։

Իսրայելի հարվածների հետևանքով սպանվել է Իրանի գերագույն առաջնորդ այաթոլլա Ալի Խամենեին։