Ուկրաինական ԱԹՍ-ները գրոհել են Ռուսաստանի հարավը. հրդեհվել է Կրասնոդարի Իլսկի նավթավերամշակման գործարանը. ՏԵՍԱՆՅՈՒԹ

ՌԴ Կրասնոդարի երկրամասի Իլսկի նավթավերամշակման գործարանը հրդեհվել է փետրվարի լույս 17-ի գիշերը անօդաչու թռչող սարքերի հարձակումից հետո, հայտնել է տարածաշրջանային օպերատիվ շտաբը, գրում է Current time-ը։

Վնասվել է նավթամթերքով պահուստարանը։ Հրդեհն ընդգրկում է մոտ 700 քառակուսի մետր տարածք, այս պահին դեպքի վայրում են գտնվում հրշեջ գնացք և 21 հրշեջ մեքենա։ Ըստ օպերատիվ շտաբի՝ տուժածներ չկան։

Մինչ այս հաղորդվել էր, որ Սևերսկի շրջանի Իլսկի գյուղում, որտեղ գտնվում է գործարանը, անօդաչու թռչող սարքի բեկորների անկման հետևանքով վիրավորվել է երկու մարդ, չորս մասնավոր տուն վնասվել է։ ԱԹՍ-ի բեկորները վնասել են Կրիմսկի շրջանի Կրասնի գյուղի լոկոմոտիվային դեպոյի շենքը: Անօդաչուի բեկորներ են հայտնաբերվել նաև Կրասնիի երկաթուղային գծերի վրա, Վարենիկովսկայա գյուղի մասնավոր տան բակում, «Կրասնոդար» ֆուտբոլային ակումբի ակադեմիայի մարզադաշտի մոտ և Սոչիի մի քանի շրջաններում:

Սևաստոպոլը վերջին ժամանակների ամենաերկարատև հարձակմանն է ենթարկվել, հայտարարել է Ռուսաստանի կողմից նշանակված նահանգապետ Միխայիլ Ռազվոժաևը։ Նա ասել է, որ տարածաշրջանի վրա խոցվել է ավելի քան 24 անօդաչու թռչող սարք։ Նախնական տեղեկություններով՝ մեկ երեխա վիրավորվել է, հայտնել է Ռազվոժաևը։ Անօդաչուի բեկորներն ընկել են քաղաքի տարբեր հատվածներում:

Ռուսաստանի պաշտպանության նախարարությունը հայտնել է, որ փետրվարի լույս 17-ի գիշերը խոցվել է ուկրաինական 151 անօդաչու թռչող սարք։

Թարգմանությունը՝ Էմմա Չոբանյանի