07.06.2026 | 00:08
Ձերբակալվել է Բյուրական համայնքի նախկին ղեկավար Զարզանդ Գրիգորյանը
Կիմ Չեն Ընը ՌԴ-ին օգնություն ցուցաբերելիս զոհված հյուսիսկորեացի զինվորների ընտանիքների բնակարաններ կնվիրի
16.02.2026 | 16:30
Հյուսիսային Կորեայի առաջնորդ Կիմ Չեն Ընը Ուկրաինայի դեմ Ռուսաստանի պատերազմին աջակցելու համար զոհված զինվորների ընտանիքների համար նախատեսված նորակառույց բնակարաններով փողոց է բացել։ Արարողությանը նա ներկա է եղել իր դստեր հետ, գրում է AFP-ն։
«Նոր փողոցը կառուցվել է մեր հայրենիքի ջերմեռանդ ցանկության շնորհիվ, որը ցանկանում է, որ իր ականավոր որդիները, որոնք պաշտպանել են ամենասուրբ բաները՝ զոհաբերելով ամենաթանկը, ապրեն հավիտյան»,- ասել է Կիմ Չեն Ընը։
Հարավկորեական և արևմտյան հետախուզական գործակալությունների տվյալներով՝ Հյուսիսային Կորեան հազարավոր զինվորների է տեղակայել Ռուսաստանի համար կռվելու համար, իսկ Սեուլը գնահատել է, որ զոհվել է մոտ 2000 մարդ։ Վերլուծաբանները նշում են, որ Հյուսիսային Կորեան դրա դիմաց Ռուսաստանից ստանում է ֆինանսական օգնություն, ռազմական տեխնոլոգիաներ, ինչպես նաև սննդամթերքի և էներգիայի մատակարարումներ։
Այսօր տարածված հաղորդագրության մեջ Ռուսաստանի մասին խոսք չկա, սակայն անցյալ շաբաթ Կիմը խոստացել էր «անվերապահորեն աջակցել» ՌԴ նախագահ Վլադիմիր Պուտինի ցանկացած որոշում։
«Մահից առաջ հերոս նահատակները, հավանաբար, մտքում պատկերացրել են իրենց սիրելի ընտանիքներին, որոնք ապրում են մշտապես բարգավաճող երկրում»,- հավելել է նա։
Հրապարակված լուսանկարներում Հյուսիսային Կորեայի ղեկավարը Սաեփյոլ փողոցում ընտանիքների համար կառուցված նոր տներում շրջում է դեռահաս դստեր՝ Ջու Աեի հետ, որը համարվում է նրա քաղաքական ժառանգորդը։ Անցյալ շաբաթ Սեուլի հետախուզական գործակալությունը հայտարարել էր, որ նա այժմ հաստատապես «նշանակվել է որպես իրավահաջորդ»՝ հղում անելով հոր հետ բարձր մակարդակի միջոցառումներին մասնակցությանը։
Այս հայտարարությունը հնչում է Փհենյանում ամենամեծ քաղաքական իրադարձության՝ կուսակցության համագումարի նախօրեին, որը նախատեսված է այս ամսվա վերջին։
Թարգմանությունը՝ Էմմա Չոբանյանի
