Առաջին անգամ եմ լսում. Զելենսկին` փետրվարի 24-ին ընտրությունների մասին հայտարարելու վերաբերյալ

Ուկրաինայի նախագահ Վլադիմիր Զելենսկին մեկնաբանել է Financial Times-ի հոդվածը, որում պնդում կա, որ նա փետրվարի 24-ին՝ Ռուսաստանի լայնածավալ ներխուժման մեկնարկի տարելիցին, կհայտարարի նոր նախագահական ընտրությունների և խաղաղության համաձայնագրի վերաբերյալ հանրաքվեի ամսաթիվը, գրում է BBC-ի ռուսական ծառայությունը։

«Առաջին անգամ եմ լսում 24-ին ընտրությունների մասին հայտարարելու մտադրության վերաբերյալ։ Հավանաբար, առաջին անգամ տեղեկացել եմ Financial Times-ից, իսկ հիմա լսում եմ ձեզանից։ Երկրորդ՝ ես բազմիցս խոսել եմ ընտրությունների մասին, մենք գնում ենք ընտրությունների, երբ կան բոլոր անվտանգության երաշխիքները»,- ասել է Զելենսկին։

FT-ը հաղորդել էր, որ Թրամփի վարչակազմը պնդում է Ուկրաինայում ընտրություններ անցկացնելու անհրաժեշտության հարցում, որը դե յուրե անհնար է ռազմական դրության պայմաններում, իսկ դե ֆակտո՝ մարտական ​​գործողությունների ընթացքում։ Հակառակ դեպքում, ըստ հրապարակման, ԱՄՆ-ը սպառնում է չեղարկել անվտանգության երաշխիքները։ Նշվում էր, որ Զելենսկին պատրաստ է ընտրություններն անցկացնել մինչև մայիսի 15-ը, չնայած շատ անկախ փորձագետներ այս վերջնաժամկետն անիրատեսական են անվանել, անգամ մարտական ​​գործողությունների դադարեցման դեպքում։

Մեկնաբանելով այս հրապարակումը՝ Զելենսկին ասել է, որ Ուկրաինան պատրաստ է ընտրությունների, բայց դրանք փետրվարի 24-ին հայտարարելը տեղին չէ։

«Սա շատ լուրջ ամսաթիվ է։ Չորս տարվա պատերազմ։ Մեծ թվով մարդիկ, որոնք պաշտպանել են մեր պետությունը, զոհաբերել են իրենց կյանքը։ Փետրվարի 24-ից ի վեր նրանք ամեն օր պաշտպանում են իրենց պետությունը»,- նշել է  նա։

Զելենսկին այս համատեքստում նաև ասել է, որ ԱՄՆ-ն իսկապես բարձրացրել է Ուկրաինայում ընտրությունների հարցը։

«Ոչ, նրանք չեն սպառնում հրաժարվել անվտանգության երաշխիքներից։ Նրանք ընտրությունները չեն կապում անվտանգության երաշխիքների հետ»,- ասել է Ուկրաինայի նախագահը։

Թարգմանությունը՝ Էմմա Չոբանյանի