17.05.2026 | 19:17
«Սուրբ Հովհաննես» մատուռ բարձրացող սարալանջին քաղաքացին վնասել է ոտքը․ փրկարարներն են օգնության հասել
Փաշազադեն Վատիկանում հանդիպել է Հռոմի Լևոն XIV պապին
Քաղաքականություն
11.02.2026 | 14:13
Կովկասի մահմեդականների վարչության (ԿՄՎ) նախագահ Շեյխ ուլ-Իսլամ Ալլահշուքյուր Փաշազադեն Վատիկանում հանդիպել է Հռոմի պապ Լևոն XIV-ի հետ։ Ըստ ադրբեջանական լրատվամիջոցների՝ Հռոմի պապը տարբեր դավանանքների ադրբեջանական ներկայացուցիչների համատեղ այցը Վատիկան որակել է որպես «խաղաղության և մարդկային եղբայրության մթնոլորտում համակեցության հնարավորության հրաշալի օրինակ»։
Փաշազադեն հրավիրել է Հռոմի պապին այցելել Ադրբեջան 2027 թվականին՝ նշելու Ադրբեջանի և Վատիկանի միջև դիվանագիտական հարաբերությունների հաստատման 35-ամյակը և Հեյդար Ալիևի ու Հռոմի պապ Հովհաննես Պողոս II-ի առաջին հանդիպման 30-ամյակը: Այս կապակցությամբ նա Լևոն XIV-ին է հանձնել Ադրբեջանի կրոնական դավանանքների խորհրդատվական խորհրդի անունից հրավերի նամակ:
Հաղորդվում է, թե հանդիպման ընթացքում Ադրբեջանի կաթոլիկ եկեղեցու քահանա եպիսկոպոս Վլադիմիր Ֆեկետեն խոսել է Ադրբեջանում, իբր, միջկրոնական հարաբերությունների բարձր մակարդակի մասին, Լեռնային հրեական համայնքի ղեկավար Միլիխ Եվդաևը՝ էթնիկ և կրոնական ներդաշնակության մթնոլորտի մասին, ալբանաուդիական քրիստոնեական կրոնական համայնքի նախագահ Ռոբերտ Մոբիլին խոսել է ալբանաուդիական ժառանգության պահպանման մասին, իսկ Բաքվի սեֆարդյան հրեական համայնքի ղեկավար Զամիր Իսաևը՝ հանդուրժողականության մթնոլորտի մասին։
Նշվում է, թե Փաշազադեն նաև տեղեկատվություն է տրամադրել Արցախի տարածքներում, իբր, կրոնական և մշակութային ժառանգության վերականգնման, նաև մզկիթների, եկեղեցիների և տաճարների վերակառուցման վերաբերյալ։
Թարգմանությունը՝ Էմմա Չոբանյանի
