Քաղաքականություն
08.02.2026 | 21:11
Կոմիկ Նուրլան Սաբուրովը առաջին անգամ հրապարակային կերպով արձագանքել է Ռուսաստան մուտք գործելու արգելքին։ Instagram-ի իր էջում նա հայտարարել է, որ «ստեղծված իրավիճակը» չի մեկնաբանի, և հարցով կզբաղվեն իրավաբանները։
«Կան իրավաբաններ, նրանք իրենց մակարդակով կզբաղվեն բոլոր հարցերով՝ բոլոր լիազոր մարմինների հետ»,-գրել է կոմիկը։
Նա հիշեցրել է, որ իր՝ որպես կոմիկի ճանապարհը սկսվել է Եկատերինբուրգում՝ 15 տարի առաջ, և շարունակվել Մոսկվայում։
«Այս տարիների ընթացքում ես եղել եմ Ռուսաստանի բազմաթիվ քաղաքներում, որոշներում՝ բազմիցս։ Ամենուր ինձ դիմավորել են բարեհամբույր և ջերմ։ Ես երախտապարտ եմ այն երկրին, որտեղ ստացել եմ ստեղծագործական զարգացման հնարավորություն, կայացել եմ որպես արտիստ և ձեռք եմ բերել մեծ, բազմազգ լսարան՝ թե՛ Ռուսաստանում, թե՛ նրա սահմաններից դուրս»,-հայտարարել է Սաբուրովը։
Հիշեցնենք՝ Նուրլան Սաբուրովին՝ Ղազախստանի քաղաքացուն, 50 տարի ժամկետով արգելվել է մուտք գործել Ռուսաստան։ Այդ մասին հայտնի է դարձել փետրվարի 6-ին։ Այդ օրը կոմիկը ձերբակալվել է մոսկովյան Վնուկովո օդանավակայանում, ուր նա ժամանել էր ԱՄԷ-ից։
РИА Новости-ի աղբյուրի խոսքով՝ Սաբուրովի նկատմամբ մուտքի արգելքը «սահմանվել է երկրի ազգային անվտանգության շահերից, օրենսդրության պահպանման և ավանդական հոգևոր-բարոյական արժեքների պաշտպանության նպատակով»։
Важных истории-ի տվյալներով՝ Սաբուրովի մուտքի արգելքը նախաձեռնել է ՌԴ ԱԴԾ-ի Սահմանադրական կարգի պաշտպանության և ահաբեկչության դեմ պայքարի ծառայությունը և դրա ղեկավար Ալեքսեյ Ժալոն։ Կոմիկի ծանոթի պնդմամբ՝ Սաբուրովին մի քանի անգամ կանչել են ԱԴԾ-ի Լուբյանկա շենք՝ համագործակցության պարտադրելով, սակայն նա ոչ համաձայնություն է տվել, ոչ էլ հրաժարվել և «փորձել է խուսափել»։ Այդ պատճառով Ղազախստանի քաղաքացիություն ունեցող կոմիկին երեք անգամ մերժել են Ռուսաստանում բնակության թույլտվություն ստանալու հարցում։
