«Ապրելու երկիր»-ն ու «Մայր Հայաստան»-ը Ծառուկյանի հետ քննարկում են ընտրություններին միասին մասնակցելու հարցը

ԲՀԿ ղեկավար Գագիկ Ծառուկյանը նախօրեին երիտասարդների հետ հանդիպման ժամանակ վերահաստատել է 2026 թվականի ընտրություններին մասնակցելու մտադրությունը։ Նա, սակայն, նշել է, որ վարչապետի թեկնածու առաջադրվելու ցանկություն չունի։

«Ես վարչապետի պաշտոնի թեկնածու, իհարկե, ունեմ, մեկի տեղը երեքն ունեմ, մեկը մեկից գրագետ, մեկը մեկից ուժեղ, պատրաստված», – ասել է նա։

Գագիկ Ծառուկյանը «Առաջարկ Հայաստանին» ծրագրով է մասնակցելու ընտրություններին, նա այս ձևաչափի շրջանակներում, ըստ էության, նախընտրական ծրագիրն է ձևավորում, հանդիպում տարբեր ուժերի։ Արդեն հայտնի է, որ նրա այս գաղափարին է միացել «Դեմոկրատական այլընտրանք» կուսակցության ղեկավար Սուրեն Սուրենյանցը։

Factor.am-ի տեղեկություններով Ծառուկյանի հետ ընտրություններին մասնակցելու տարբերակն են քննարկում նաև Մանե Թանդիլյանի և Մեսրոպ Առաքելյանի կողմից հիմնադրված «Ապրելու երկիր» կուսակցությունում։ Ծառուկյանի և նրանց միջև հանդիպում է եղել։ Այս տեղեկությունը ո՛չ Թանդիլյանը, ո՛չ Առաքելյանը չհերքեցին, սակայն, նաև չհաստաեցին՝ նշելով, որ քննարկումներ են անցկացնում տարբեր ուժերի հետ։

«Չկա որևէ վերջնական բան, դրա համար զերծ կմնամ որևէ բան ասելուց այս փուլում, քանի որ դեռ չկա հստակություն»,- ասաց Մանե Թանդիլյանը։

Factor.am-ի տեղեկություններով Ծառուկյանի հետ դաշինքով ընտրություններին մասնակցելու հարցը քննարկում է նաև «Մայր Հայաստան» կուսակցությունը։ Թեմայի վերաբերյալ կուսակցության նախագահ Անդրանիկ Թևանյանից մեկնաբանություն ստանալ չհաջողվեց, նա զանգերն անպատասխան թողեց։

Հիշեցնենք՝ Թևանյանը 2021-ի ընտրություններում Ռոբերտ Քոչարյանի ղեկավարած «Հայաստան» դաշինքում էր, սակայն, իր թիմով դուրս եկավ դաշինքից և հրաժարվեցին պատգամավորական մանդատներից։

Factor.am-ը քննարկումների վերաբերյալ փորձեց նաև մեկնաբանություն ստանալ Գագիկ Ծառուկյանի մամուլի խոսնակ Իվետա Տոնոյանից, սակայն նա ևս զանգերին չպատասխանեց։

Նարեկ Կիրակոսյան