Քաղաքացուն հարվածած ոստիկանին ձերբակալելու որոշում կա. վարույթը խոշտանգման հատկանիշներով է 

Խոշտանգման հոդվածով հանրային քրեական հետապնդում է հարուցվել Ոստիկանության ծառայող Հայկ Հակոբյանի նկատմամբ։ Այս մասին Factor TV-ի գրավոր հարցմանն ի պատասխան հայտնեցին Գլխավոր դատախազությունից.

«04.02.2026 թվականին նախաձեռնվել է քրեական վարույթ:  05.02.2026 թվականին դատախազի կողմից հանրային քրեական հետապնդում է հարուցվել Ոստիկանության ծառայողի նկատմամբ՝ Քրեական օրենսգրքի 450-րդ հոդվածի 1-ին մասով»։

Քննչական կոմիտեն ևս Factor TV-ի գրավոր հարցմանն ի պատասխան որոշ մանրամասներ է հայտնում վարույթից.

«Առերևույթ հանցանքի մասին հաղորդման առթիվ ՀՀ քննչական կոմիտեի հատկապես կարևոր գործերի քննության գլխավոր վարչության խոշտանգումների և պաշտոնատար անձանց կողմից բռնություն գործադրելով լիազորությունները չարաշահելու կամ անցնելու հանցագործությունների քննության վարչությունում նախաձեռնվել է քրեական վարույթ: Քրեական վարույթի նախաքննության ընթացքում ձեռք բերված փաստական տվյալների հիման վրա Հ.Հ.-ի նկատմամբ հարուցվել է հանրային քրեական հետապնդում՝ խոշտանգումը՝ պաշտոնատար անձի կողմից կամ նրա դրդմամբ, կարգադրությամբ կամ գիտությամբ որևէ անձի դիտավորությամբ ֆիզիկական ուժեղ ցավ կամ հոգեկան ուժեղ տառապանք պատճառելը` այդ կամ երրորդ անձից տեղեկություն կամ խոստովանություն ստանալու նպատակով հոդվածի հատկանիշներով: Որոշում է կայացվել վերջինիս ձերբակալելու մասին: Նախաքննությունը շարունակվում է»։

Նշենք, որ տեսանյութի տարածումից հետո միայն 3-րդ օրն է հայտնի դառնում քրեական վարույթի նախաձեռնման մասին։ Այս ընթացքում իրավապաշտպանները մտահոգություն էին հայտնում, որ ոստիկանը կարող է այդ ընթացքում փորձել ազդել վկաների վրա։  

Հիշեցնենք՝ փետրվարի 3-ին լրագրող Սյուզի Բադոյանը տեսանյութ տարածեց, որտեղ երևում էր, թե ինչպես է ոստիկանը հարվածելով, նվաստացնելով և հայհոյելով փորձում քաղաքացուց ցուցմունք կորզել։ Ըստ նախնական տեղեկությունների՝ դեպքը տեղի է ունեցել հոկտեմբերին։ Այս պահին իրավապահ մարմինները չեն մանրամասնում, թե ով է լուսանկարել և տարածել խոշտանգման կադրերը։

Ռոզա Վարդանյան