Քաղաքականություն
03.02.2026 | 10:59
ԱՄՆ նախագահ Դոնալդ Թրամփը պնդում է, որ Հնդկաստանի վարչապետ Նարենդրա Մոդին իր հետ հեռախոսազրույցում համաձայնել է դադարեցնել ռուսական նավթի գնումները։ Սպիտակ տան ղեկավարը հեռախոսազրույցի արդյունքների մասին հաղորդագրություն է հրապարակել իր TruthSocial սոցիալական հարթակում, գրում է DW-ի ռուսական ծառայությունը։
Թրամփի խոսքով՝ Հնդկաստանը պատրաստ է ավելացնել ԱՄՆ-ից և, հնարավոր է, Վենեսուելայից գնումները։
«Սա կօգնի դադարեցնել Ուկրաինայում պատերազմը, որը շարունակվում է հենց հիմա և ամեն շաբաթ հազարավոր մարդկանց կյանք է խլում»,- գրել է Թրամփը։
Սպիտակ տան ղեկավարը, միաժամանակ, ընդգծել է, որ Վաշինգտոնը համաձայնել է Հնդկաստանի նկատմամբ առևտրային մաքսատուրքերն անհապաղ նվազեցնել՝ 25%-ից մինչև 18%։
ԱՄՆ նախագահը հայտարարել է, որ Մոդին կընդլայնի ամերիկյան ապրանքների գնումները։ Նրա պնդմամբ՝ Հնդկաստանը «կշարունակի առաջ շարժվել իր մաքստուրքերը և ոչ մաքսատուրքային արգելքները Միացյալ Նահանգների նկատմամբ զրոյի հասցնելու ուղղությամբ»։
Իր հերթին, Հնդկաստանի վարչապետը X սոցիալական ցանցում գրել է, որ «հրաշալի» զրույց է ունեցել ամերիկացի առաջնորդի հետ։
«Շատ ուրախ եմ, որ Հնդկաստանում արտադրված ապրանքների մաքսատուրքն այժմ կնվազի մինչև 18%։ Երբ երկու խոշոր տնտեսություններ և աշխարհի ամենամեծ ժողովրդավարությունները համագործակցում են, դա օգուտ է բերում մեր ժողովուրդներին և բացում է փոխշահավետ համագործակցության հսկայական հնարավորություններ»,- գրել է նա՝ առանց ռուսական նավթի հետ կապված իրավիճակի մասին հիշատակելու։
Թարգմանությունը՝ Էմմա Չոբանյանի
