Կիևն ու Մոսկվան առանձին խաղաղության համաձայնագրեր կստորագրեն Վաշինգտոնի հետ․ Ուկրաինայի ԱԳ նախարար

Խաղաղության բանակցությունները պետք է հանգեցնեն երկու առանձին համաձայնագրերի ստորագրման․ մեկը՝ ԱՄՆ-ի և Ռուսաստանի, մյուսը՝ ԱՄՆ-ի և Ուկրաինայի միջև։ Այս մասին հայտարարել է Ուկրաինայի արտաքին գործերի նախարար Անդրեյ Սիբիհան «Европейская правда»-ին տված հարցազրույցում, գրում է Meduza-ն։

«Եթե խոսքը կոնկրետ այս 20 կետանոց շրջանակի մասին է, դա երկկողմ փաստաթուղթ է, որը կստորագրեն ԱՄՆ-ն և Ուկրաինան։ ԱՄՆ-ը նաև պետք է ստորագրի Ռուսաստանի հետ։ Սա այն շրջանակն է, որը ներկայում քննարկվում է, բայց բանակցությունները դեռ շարունակվում են. դա գործընթաց է»,- ասել է Սիբիհան։

Նրա խոսքով՝ եվրոպական կողմը, որի ստորագրությունը չի սպասվում, այնուամենայնիվ, «ներկա է խաղաղության գործընթացում և անվտանգության երաշխիքների վերաբերյալ համաձայնագրերում»։

Սիբիհան հավելել է, որ բանակցություններում երկու վիճելի հարց մնում է չլուծված՝ տարածքային վեճերը և Զապորոժիեի ատոմակայանը։ Այս հարցերը լուծելու համար, նրա խոսքով, Ուկրաինայի նախագահ Վլադիմիր Զելենսկին պատրաստ է հանդիպել ՌԴ նախագահ Վլադիմիր Պուտինի հետ։

Financial Times-ի աղբյուրների համաձայն՝ բանակցությունների ընթացքում ԱՄՆ-ն Ուկրաինային հասկացրել է, որ ամերիկյան անվտանգության երաշխիքները կախված են Կիևի կողմից խաղաղության համաձայնագրի համաձայնությունից, որը կենթադրի Ռուսաստանին Դոնբասի հանձնում: Սպիտակ տունն այս տեղեկատվությունը որակել է «բացարձակ սուտ»:

Reuters-ի աղբյուրը նաև նշել է, որ ԱՄՆ-ը չի թելադրում Ուկրաինային, թե ինչ պետք է ներառվի խաղաղության համաձայնագրում, իսկ հակառակ պնդումները սխալ է անվանել:

Թարգմանությունը՝ Էմմա Չոբանյանի